Ekologtar qap-qara pıngvındi sýretke túsirip aldy
ASTANA. Naýryzdyń 11-i. QazAqparat - Sırek kezdesetin aýrýmen aýyratyn, sonyń saldarynan qap-qara túske boıalǵan pıngvın sýretke túsirip alyndy. Anomaldy pıngvın sýbantarktıkalyq Ońtústik Georgııa aralyndaǵy (Ulybrıtanııa) Fortýna Beı jaǵalaýy mańynda júrgizilgen zertteýler barysynda kózge túsip otyr,
dep habarlaıdy brıtandyq buqaralyq aqparat quraldary.
Tumsa tabıǵatty zertteýge barǵan ǵalymdar tobynyń ókili Endrıý Evanstyń aıtýynsha, melanızmge shaldyqqan (pıgmentatsııanyń aýytqýy saldarynan aǵzada qara pıgmenttiń basym bolýy) qara pıngvınderdiń áreketterinde olardyń ala aǵaıyndarynan anaý aıtqandaı aıyrmashylyqtary joq. «Olardyń qorektenýlerinde de, aǵaıyndarymen aralasýynda da eshqandaı aıyrmashylyq joq. Biraq olardy kezdestirgende tań qalǵanymyz anyq jáne olardy kelesi maýsymda da kóre alamyz degen úmittemiz», - deıdi E.Evans.
Qara pıngvınder - tabıǵatta sırek kezdesetin qubylys. Orta eseppen, 250 myń pıngvınniń ishinen osyndaı «qara aǵaıyn» kezdesýi múmkin. Degenmen, melanızm aýrýy basqa janýarlardyń arasynda jıirek kezdesedi, ásirese tıinderdiń, túlkilerdiń, jándikter men balyqtardyń arasynda. Al sútqorektilerdiń arasynda melanızm mysyqtarda kezdesedi. Osyndaı mýtatsııaǵa beıim leopard, pýma jáne ıagýar syndy janýarlar ádette qara panteralar dep atalady.
