Ekologtar aýladaǵy qoqys jáshikterin jańǵyrtýdy usyndy
ALMATY. QazAqparat - Almatyda ótip jatqan «Reduce. Reuse. Recycle. Recover» bıznes forýmynda turmystyq qaldyqtardy óńdeý men kómý týraly bıznes usynystar aıtyldy, dep habarlaıdy QazAqparat tilshisi.
«Qazaqstan TKSh qaıta jańǵyrtý jáne damý ortalyǵy» AQ basshysy Dastan Hamzın osy baǵytta memleket tarapynan qandaı is-qımyl jasalyp jatqanyn aıtty.
«Eki varıant qarastyrylyp otyr. Birinshisi boıynsha turǵyndar qoqys sorttamaıdy. Qoqys arnaıy paketterge salynyp, júk kóligine salynatyn kezde sorttalady. Ekinshi varıant boıynsha, arnaıy sektsııaǵa bólingen jańa jáshikter ornatylady. oǵan turǵyndar ózderi sorttalǵan qoqys ákep salady. Eger osy varıanttardyń birin tańdaıtyn bolsaq, ulttyq standart jasaıtyn bolamyz», - dedi Dastan Hamzın.
«Tabıǵat» ekologııalyq odaǵynyń tóraǵasy Mels Eleýsizov qoqysty zaýytqa jetkenshe sorttaý mańyzdy ekendigin aıtty.
«Qazir Almatyda qoqys óńdeý zaýyty ashyldy. Biraq, oǵan jetkenshe qoqys shirip ketedi. Ony óńdeý múmkin emes. Astanada da sol. Men qarapaıym tásil usynamyn. Ár aýladaǵy qoqys jáshiginiń janynda qoqys sorttaý pýnktin salý kerek. Ol jerde qyzmetker turǵyndar ákelgen qoqysty sorttap, sektsııalarǵa salyp turady. Birinshiden, azamattardy jumyspen qamtýǵa bolady. Ekinshiden zaýyttarǵa taza shıkizat barady. Joba az ýaqytta ózin ózi aqtaıtyn bolady», - dedi Mels Eleýsizov.
Onyń aıtýynsha, qazir Qazaqstanda qatty qaldyqtardyń 43%-y qaıta óńdeýge jatpaıdy.
