Ekologtar «ArselorMıttal Temirtaý» kompanııasyna 600 mln teńge aıyppul saldy
QARAǴANDY. QazAqparat - «ArselorMıttal Temirtaý» kompanııasynyń metallýrgııalyq kombınatyna ekologııaǵa zııan keltirgeni úshin 600 mln teńge aıyppul salyndy, dep habarlaıdy «QazAqparat» HAA tilshisi.
Oblystyq ekologııa departamentiniń habarlaýynsha, qara tústi qardyń jaýýyna bul aıyppuldyń eshqandaı qatysy joq. Ekologtardan, meteorolgtar men prokýrorlardan quralǵan jumys toby qara tústi qardyń jaýý sebebin qazirgi ýaqytta anyqtap jatyr. Jumys toby Qaraǵandy oblysynyń ákimi Erlan Qoshanovtyń tapsyrmasy boıynsha qurylyp, kún saıyn jumys júrgizýge mindettelgen bolatyn.
Oblystyq ekologııa departamenti basshysynyń orynbasary Álibek Bekmuhambetovtyń aıtýyna qaraǵanda, aıyppul qorshaǵan ortany lastaǵany úshin salynǵan.
«Atmosferaǵa bólingen zııandy shyǵarylymdardyń artqany belgili bolyp otyr. Ruqsat etilgen shyǵarylymdardyń normatıvten artqany jáne tabıǵat qorǵaý sharalarynyń jospary oryndalmaǵany anyqtaldy. Buzýshylyqtardy retke keltirý boıynsha tapsyrma (predpısanıe) berildi», - deıdi Álibek Bekmauhambetov.
Aıyppuldyń mólsheri 105 mıllıon teńgeni quraıdy. Al qalǵan soma - ekologııaǵa keltirilgen zııan úshin tólenetin ótemaqy.
Eske sala ketsek, buǵan deıin Temirtaýda qara tústi qardyń jaýýyna jeltoqsan aıy boıy jel jyldamdyǵynyń baıaý bolýy sebep bolýy múmkin degen pikir aıtylǵan bolatyn. Jel týraly nusqany 9 qańtar kúni óńir ákimdiginde Qaraǵandy meteorologııa ortalyǵy dırektorynyń orynbasary Valerıı Stratıenko aıtqan edi.
