Ekologtar Aqtóbe oblysyndaǵy Bor taýy aımaǵynan munaı izdeýge ruqsat berdi

Baıǵanın aýdanyndaǵy Aqtolaǵaı taý jotasynan 11 shaqyrym qashyqtyqtan «Batys Prekaspıı» kompanııasy munaı barlaý jumystaryn júrgizedi. Buǵan ekologtar ruqsat berdi, dep habarlaıdy QazAqparat Dıapazonǵa silteme jasap.

Aqtolaǵaı – Baıǵanın aýdanyndaǵy taý silemi. Munda jel men ýaqyttyń áserinen paıda bolǵan músinder kóp bolǵandyqtan, aımaqty ashyq aspan astyndaǵy murajaı dep ataıdy.

"Ruqsat berý kezinde Aqtolaǵaı aýmaǵy baqylaýda bolady. Aqtolaǵaı shekarasynan qosymsha 11 shaqyrym qashyqtyqtan munaıǵa barlaý júrgiziledi. Jumys barysynda jarylys emes, diril ádisi qoldanylmaq. Ashyq aspan astyndaǵy murajaıǵa eshqandaı zalaly tımeıdi dep senemiz. Jer asty sýlary áser etpeıdi. Eger qandaı da bir zalaly tıetin bolsa, quzyrly organdar kez kelgen jaǵdaıda aralasady», - dep túsindirdi Aqtóbe oblystyq tabıǵatty qorǵaý basqarmasy basshysynyń orynbasary Talap Ýsnadın.

2006 jyly Aqtolaǵaı respýblıkalyq mańyzy bar tabıǵı-qoryq qory obektileriniń tizimine endi. Onyń shekarasy da, tólqujaty da joq. Olar bul máseleni aldaǵy ýaqytta qarastyrady.