Ekologııalyq taza drondar: Aqtaý oqýshylary úzdik jobalaryn usyndy
AQTAÝ. QazAqparat - Aqtaý qalasyndaǵy Nazarbaev zııatkerlik mektebiniń oqýshylary «Jas. Jalyn. Jańǵyrý» halyqaralyq jastar forýmynda shóldenýge qarsy kúres jobasy, bıshi robottar, zaǵıptarǵa arnalǵan «aqyldy» bórik sııaqty ǵajap ázirlemelerin kórsetti, dep habarlaıdy «QazAqparat» HAA tilshisi.
Shara aıasynda «Taratýǵa laıyqty ıdeıa» formatyndaǵy «TEDx NIS» robottyq tehnıka jobalarynyń kórmesi uıymdastyryldy. Onda Almatydan kelgen San-Frantsıskoda ótken TechNovation Challenge Gran-prı jeńimpazy Dııara Beısembekova SOS-habarlamaǵa dál geopozıtsııa kórsetýge arnalǵan GPS qabyldaǵyshy bar QamQare mobıldi qosymshasyn, taǵy bir almatylyq oqýshy Danııar Turǵambaev First Global Challenge robotyn, aqtaýlyq Ǵalamaddın Asqaruly zaǵıptarǵa arnalǵan «aqyldy» bórkin, Oraldan kelgen Asan Bekqalıev robottandyrylǵan mobıldik sý elektr stantsııasyn, semeılik Ádil Ordaev «bıshi robotyn», Al Atyraýdyń týmasy Aınur Adaıbaeva shóldenýge qarsy kúresetin robotyn usyndy.
Oqýshylardyń ǵylymı-zertteý jumystary men barlyq robottar halyqaralyq jáne respýblıkalyq baıqaýlar men olımpıadalarda júldeli bolǵan, dıplomdar alǵan.
«Bizdiń qalamyz Atyraýǵa shóldený qaýpi tónip tur, tipti mektebimizdiń mańyndaǵy ósimdikter de nashar ósedi. Sondyqtan da qýańshylyqqa qarsy kúresetin robot jasaǵymyz keldi. Bul qazirge lego konstrýktorlarynan jasalǵan prototıp, aldaǵy ýaqytta detaldardy berik materıaldardan jasaımyz, robottyń denesi de úlkendeý bolady. Mamyr aıynda robotty synaqtan ótkizip edik, bir aptadan keıin sebilgen tuqym ónip shyqty. Osy jobamyz Atyraýdaǵy jastar forýmynda «Ekologııa boıynsha úzdik joba» atandy. Jetekshim - Naızabek Ázerbaev», - deıdi Aınur Adaıbaeva.
Taǵy bir tamasha qondyrǵyny jasaǵan almatylyq oqýshy qaýip tóngen adamdardy qutqarýǵa asyǵady eken. «Biz qutqarýshy dron jasadyq. Keıde TJ qyzmetkerleri bara almaıtyn jerler bolady, al bizdiń dron sol kezde kómekke kelip, ómirine qaýip tóngen adamdy qutqarady. Eger dron adamdy kótere almasa, oǵan qajetti kıim, dám-sý, dári-dármek bere alady. Dronnyń bir ǵajaby, ol vırtýaldyq jolmen basqarylady, onyń baǵdarlamasyn ózim jazyp shyqtym. «Eır Astanaǵa» dronymyz unady, munymen tipti Kosta-Rıkadaǵy kórmege qatystyq. Qazirge ol legodan qurastyrylǵandyqtan, óz salmaǵynan basqa 1 kg júkti kótere alady», - deıdi Almaty NZM oqýshysy Ánel Qaremǵalı.
«Álemde tolqyn eń tabysty energııa kózi. Kún men jel turaqty emes, al tolqyndar únemi qasymyzda. Densaýlyqqa zııansyz, oryn da almaıdy. Sýdyń betinde kınetıkalyq energııa kóp, ony paıdalaný kerek. Básekelesimizdiń qondyrǵysy energııany magnıttik ındýktsııa ádisimen jınaıdy, al biz kez kelgen adam qurastyra alatyn mehanızm jasadyq. Oralda, Jaıyq boıynda ony synap kórdik. 12 volt energııa aldyq, al uıaly telefondy qýattaýǵa nebári 5 volt jetkilikti», - deıdi Dana Sultanova. Ol bul joba boıynsha Oral NZM-de Oraza Mádınamen birge jumys istep jatyr.
Forým qorytyndylaryna oraı QR Zııatkerlik mektepteriniń oqýshylary ózderiniń áleýmettik jobalary boıynsha Nurmuhan Jantórin atyndaǵy oblystyq mýzykalyq-drama teatrynda «Uly dala muragerleri» shyǵarmashylyq esebin tapsyrdy. 
