Ekologııalyq talaptardy oryndaý jaýapkershiligin kúsheıtý maqsatynda qylmystyq jáne ákimshilik kodeksterge túzetýler engiziledi

Bul týraly búgin Parlamentte «Qazaqstan Respýblıkasynyń keıbir zańnamalyq aktilerine ekologııalyq máseleler boıynsha ózgertýler men tolyqtyrýlar engizý týraly» Zań jobasyn tanystyrǵan Qorshaǵan ortany qorǵaý mınıstri Nurǵalı Áshimov málim etti.

«Tabıǵat paıdalanýshylardyń ekologııalyq talaptardy oryndaý jaýapkershiligin kúsheıtý maqsatynda qylmystyq jáne ákimshilik kodeksterge túzetýler engiziledi» - dedi mınıstr.

Onyń atap ótýinshe, ekologııalyq quqyq buzýshylyq boıynsha qylmystyq zańnamany qoldaný máseleleri quqyq qorǵaý organdarynyń úılestirý keńesinde birneshe márte qaralǵan. Sonymen qatar qylmystyq normalardyń búgingi kúni tıimsiz jáne jańa ekologııalyq qaýipterge sáıkes kelmeıtindigi dáleldengen. «Ekologııalyq qylmystarǵa arnalǵan 18 baptyń 3-4 baby ǵana naqty qoldanylady. Onyń ózi brakonerlik úshin. Sońǵy 5 jylda ekologııalyq zańnamanyń kóptegen dóreki buzylýyna qaramastan aıyptylardyń bireýi de qylmystyń jaýapkershilikke tartylmaǵan. Zańnamanyń solqyldaq tusy qylmyskerdiń jazaǵa tartylmaýyna múmkindik beredi. Bul jaǵdaılardy túzetý úshin zań jobasyna ekologııalyq qylmystardyń ólshemderi engiziledi», - dedi N.Áshimov.

Zalaldyń ólshemi qorshaǵan ortaǵa keltirilgen zalaldy óndirý jónindegi qoldanystaǵy tájirıbe boıynsha aıqyndalǵanyn basa aıtqan mınıstrdiń sózine qaraǵanda, osy túzetýler ekologııalyq kodeksti jáne zań jobasynyń normalaryn múltiksiz oryndaýdy qamtamasyz etpek.