Ekologııalyq talaptardy buzǵan Atyraý munaı óńdeý zaýytyna aıyppul salyndy

ASTANA. QazAqparat – Atyraý munaı óńdeý zaýytyna 40 mln teńgeden astam aıyppul salyndy. Bul týraly BAQ ókilderiniń qatysýymen ótken brıfıngide Ekologııalyq retteý jáne baqylaý komıtetiniń tóraǵasy Zulfuhar Joldasov málim etti, dep habarlaıdy QazAqparat tilshisi.

«Atyraý munaı óńdeý zaýyty – Atyraý qalasyndaǵy atmosferalyq aýany lastaýdyń negizgi kózderiniń biri. Kásiporynnyń qala aýasynyń lastanýyna qosqan úlesi – 46,5%. Al, qala boıynsha shyǵaryndylar 23 myń tonna bolsa, onyń 10,7 myń tonnasy kompanııaǵa tıesili.

Atyraý oblysy boıynsha ekologııa departamenti sońǵy úsh jylda kompanııaǵa qatysty 11 tekserý júrgizdi. Onyń 4-eýi osy jyly. Baqylaý barysynda anyqtalǵan negizgi zań buzýshylyqtar – shekti ruqsat etilgen shyǵaryndylardyń belgilengen normatıvterinen asyp ketýi jáne alaýdaǵy gazdy jaǵý saldarynan ekologııalyq ruqsatsyz qorshaǵan ortaǵa emıssııany júzege asyrý. Osy jyldyń qorytyndysy boıynsha kásiporynǵa jalpy somasy 40 mln teńgeden astam aıyppul salyndy», - dep toqtaldy komıtet tóraǵasy.

Sonymen qatar, qoıylǵan talaptardy saqtamaǵany úshin zaýyttyń 4 obektisine berilgen ekologııalyq ruqsat merziminen buryn toqtatylǵan. Buǵan qosa, kompanııa 2025 jylǵa deıin aýaǵa bóletin zııandy qaldyqtar kólemin 25 paıyzǵa qysqartýǵa mindetteldi.

Foto: ortcom.kz