Ekologııalyq sharalarda jınalǵan ball jumysqa ornalasqanda eskerilýi tıis - depýtat
NUR-SULTAN. QazAqparat – Búgin Parlament Májilisiniń jalpy otyrysynda depýtat Darhan Myńbaı qoqysty suryptamaıtyndarǵa joǵary tarıf jáne ony jańa ádispen kádege jaratatyndarǵa tómendetilgen tarıf arqyly turǵyndardy yntalandyrý qajettigin aıtty, dep habarlaıdy QazAqparat tilshisi.
«Jalpy qoǵamnyń ekologııalyq problemalarǵa kóńil bóle bastaǵanyn jaqsyǵa balaǵan jón. Olar bereketsizdikti, qoqysty fotoǵa, vıdeoǵa túsirip, áleýmettik jelilerge jiberip, tabıǵatty, qorshaǵan ortany qorǵaýdaǵy azamattyq ustanymyn bildire bastady. 3-4 jyl buryn jaǵdaı múldem basqasha bolǵanyn eskersek, muny órkenıettiń ólshemi, mádenıetimizdiń óskeni dep qabyldaǵan abzal. Búgingi tańda bizde 3520-ǵa jýyq qatty turmystyq qaldyqtar polıgony bar eken, biraq olardyń 17,6 paıyzy ǵana ekologııalyq talaptar men sanıtarlyq normalarǵa sáıkes keledi. Sondaı-aq, «Qazaqstan Ǵarysh Sapary» AQ 9 myńnan astam zańsyz úıindilerdi fotoǵa túsirip, anyqtaǵan. Elimizde qaldyqtardy suryptaıtyn jáne qaıta óńdeıtin 170 kásiporyn kesheni bar, olar zamanaýı zavod emes», - dedi Darhan Myńbaı QR Úkimet basshysy Asqar Mamınniń atyna joldaǵan depýtattyq saýalynda.
Onyń paıymynsha, elde halyqtyń jáne bıznestiń tólemderin shoǵyrlandyratyn ári olardy qatty qaldyqtardy jınaýǵa, suryptaýǵa jáne qaıta óńdeýge baǵyttaıtyn arnaıy «qoqys habtaryn» quryp, olardyń sanyn arttyrýǵa bolar edi. Munyń joba-shemasy mynadaı: habtar qaldyqtardy jınaýshylarǵa aqy tóleıdi, sol arqyly olardyń ózderi de qaldyqtardy zańdy polıgondarǵa jetkizýge yntaly bolady. Árıne, suryptalǵan qoqys úshin tarıfterdiń joǵary bolatyny túsinikti. Munyń paıdasy jańa óndiris, jańa jumys oryndary, jańa oılaý júıesi degendi bildiredi.
«Biz Úkimetke ozyq tájirıbelerdi qoldaný múmkindigin jáne jalpy ekologııaǵa qatysty ózekti problemalardy sheshýde kózdelgen keshendi is-sharalardy ýaqyt talabyna sáıkes qaıta qarap, pysyqtaýdy usynamyz. Bul oraıda, qoqys óndeý salasyn retteýmen qatar qazaqstandyqtardyń ekologııalyq mádenıetin de kóterý erekshe mańyzdy dep oılaımyz. Al ekologııalyq sananyń deńgeıi bilim berý men aǵartýshylyq, úgit jumystarynyń sapasyna baılanysty bolmaq. Qoqystardy bólip jınaýdy keńinen nasıhattaý qajet – áleýmettik rolıkterdi ázirlep, BAQ-ta, praım-taım-da telearnalar arqyly kórsetý, oqýshylar, stýdentter arasynda, kásiporyndar men uıymdarda makýlatýra, qoldanystan shyqqan plastık zattar, elektrondyq buıymdar jınaý júıesin engizsek. Sonymen birge, volonterler stadıondarda jarystar ótkende plastık shólmekterdi jınaý aktsııalaryn ótkizse, ony sport federatsııalary qoldap jatsa, tıimdi ári taǵylymdy shara emes pe? Ekologııalyq aktsııalar, ekologııa aılyqtaryn ótkizý tek zańdy tulǵalardyń ǵana emes, jeke tulǵalardyń da aktıv esebine jazylyp, jınaqtalǵan ball jumysqa ornalasý kezinde de, sondaı-aq basqa da memlekettik qyzmetterdi paıdalaný kezinde eskerilýi tıis. Qoqysty suryptamaıtyndarǵa joǵary tarıf jáne ony jańa ádispen kádege jaratatyndarǵa tómendetilgen tarıf sııaqty ıkemdi tarıfterdi belgileý arqyly turǵyndardy yntalandyrý qajet ári mańyzdy. Keıbir saýalnamalarǵa qaraǵanda, qala turǵyndarynyń 80 paıyzy qoqysty bólek jınaýǵa ázir ekendikterin bildirgen, bul - qýanarlyq jetistik», - dedi depýtat.
Osy oraıda ol qoqysty túpkilikti óńdeý zaýyttaryn salý, arnaıy qoqys habtaryn qurý jóninde máselelerdi qaraýdy, aldaǵy jarııalanǵan Volonter jylynda qorshaǵan ortany qorǵaýda volonterlik bastamalardy baǵalaý júıesin engizýdi usyndy.
