Ekologııalyq kodekstiń jańa redaktsııasy kúshine endi

NUR-SULTAN. QazAqparat – Ekologııalyq kodekstiń jańa redaktsııasy kúshine endi. Bul týraly Ekologııa, geologııa jáne tabıǵı resýrstar mınıstriniń orynbasary Ahmetjan Pirimqulov Green energy & Waste recycling forum atty jańartylatyn energııa jáne qaldyqtardy qaıta óńdeý jónindegi 5-shi eýrazııalyq bıznes-forýmynda aıtty, dep habarlaıdy QazAqparat.

«Ózderińiz biletindeı, 2013 jyldan beri jasyl ekonomıkaǵa ótý tujyrymdamasy iske asyp jatyr. Sonyń aıasynda sý resýrstaryn tııanaqty paıdalaný, aýyl sharýashylyǵyn damytý, qaldyqtardy basqarý, aýanyń lastanýyn tejeý boıynsha kóptegen ındıkatorlar ázirlengen bolatyn. Bul tujyrymdamanyń baǵyttary turaqty damýdyń maqsattarymen tikeleı baılanysty. Búgingi forýmnyń ashylýy da sımvoldy sátke dóp kelip otyr. Ekologııalyq kodekstiń jańa redaktsııasy kúshine endi. Bul mınıstrlik mamandary men Parlament depýtattarynyń, bıznes ókilderi men ekologııa janashyrlarynyń birlesken eńbeginiń arqasynda iske asty», - dedi vıtse-mınıstr.

Jańartylatyn energııa jáne qaldyqtardy qaıta óńdeý jónindegi 5-shi eýrazııalyq bıznes-forýmnyń plenarlyq otyrysynda Ekologııa, geologııa jáne tabıǵı resýrstar vıtse-mınıstri Ahmetjan Pirimqulov, «ÓKM Operatory» JShS basqarma tóraǵasy Medet Qumarǵalıev, BUU Qorshaǵan orta, sýbóńirlik keńsesiniń ókilderi jáne tabıǵat janashyrlary qatysyp, pikir almasty.

Forýmnyń sessııa jumysynda «jasyl» ekonomıkanyń damýyna tosqaýyl bolyp turǵyn kedergiler, qaldyq óńdeý sektoryndaǵy damýdyń jańa múmkindikteri, kómirsýtektiń ekonomıkadaǵy úlesin azaıtý shartynda jumys isteý tásilderi sııaqty máseleler talqylanady.