Ekologııalyq kodekste kúl-qoqysty qaıta óńdeýge erekshe kóńil bólinedi - Atameken
ASTANA. QazAqparat - «Atameken» ulttyq kásipkerler palatasy kúl-qoqysty qaıta óńdeý jobalaryna qoldaý jasaýǵa daıar, dep xabarlaıdy QazAqparat tilshisi.
Palata tóraǵasynyń orynbasary Eldos Razanovtyń aıtýynsha, kúl-qoqysty qaıta óńdep otyrsa, munaıdy únemdep otyrýǵa bolady.
«Búginde jańa Ekologııalyq kodekstiń tujyrymdamasy ázirlenip jatyr. Atalǵan qujatta jasyl texnologııalardy damytý jáne kúl-qoqysty óńdeý sharalaryn keńinen qoldaný jaıy kórsetilgen. Osy oraıda balamaly qýat kózderin keńinen damytýǵa bolady dep oılaımyn. Kúl-qoqysty qaıta óńdep, bıogazdy alýǵa múmkindik bar. Máselen, kúl-qoqystyń tórt tonnasynan bir tonna munaı beretin jylýdy alýǵa bolady eken. «Atameken» ulttyq kásipkerler palatasy osy ispetti texnologııalardy engizýge qajetti normatıvtik bazany ázirleýge daıyn» - dedi E.Ramazanov búgin balamaly energııa kózderine arnalǵan xalyqaralyq sammıtte.
Aıta keteıik, atalǵan sammıtte QR Energetıka vıtse-mınıstri Maxambet Dosmuxambetovtiń balamaly energııa boıynsha alǵash ret uıymdastyrylǵan aýktsıondar týraly aıtyp berdi.
«Kúni keshe ǵana balamaly energııa kózderi boıynsha kóktemgi aýktsıondar aıaqtaldy. 10 aýktsıonnyń 8-i sátti ótti. Saýda-sattyqqa otandyq kompanııalar ǵana emes, sheteldik ınvestorlar da qatysty. Barlyǵy - 42 kompanııa. Olardyń ishinde Qazaqstan, Reseı, Frantsııa, Bolgarııa, Túrkııa men Qytaıdyń ókilderi bar. Biz alǵash ret xalyqaralyq saýda-sattyqty elektrondy formatta ótkizdik. Qytysýshylar 960 MVt energııany óndirýge daıyn ekenin jetkizdi. Atalǵan kórsetkish alǵashqy jospardan tórt esege artyq bolyp tur», - dedi M.Dsomuxambetov búgin balamaly energııa kózderin damytýǵa arnalǵan sammıtte.
Onyń aıtýynsha, ınvestorlar tarapynan Qazaqstanda balamaly energııa nysandaryn salýǵa degen qyzyǵýshylyq joǵary bolǵannan keıin atalǵan qýat kózderiniń tarıfteri tómendedi.
«Máselen, jel elektr stansalarynyń tarıfteri 20 protsentke, shaǵyn sý elektr stansalarynyń tarıfteri 23 protsentke, al kún elektr stansalarynyń tarıfteri 25 protsentke tústi. Qazirdiń ózinde 19 kompanııa balamaly energııa kózderin satyp alýshy biryńǵaı kompanııamen kelisimshartqa otyryp, 194 MVt energııany óndirýge daıyn. Búginde kúzgi aýktsıondarǵa daıyndyq jumystary bastalyp ketti. Atalǵan aýktsıondar qazan aıynda uıymdastyrylady», - dep atap kórsetti M.Dosmuxambetov.
