Ekologııalyq ınspektor kásipkerlerden zańsyz 90 mıllıonǵa jýyq teńge shyǵyn ótep almaq bolǵan - Prokýratýra
ASTANA. 19 qańtar. QazAqparat - Memlekettik ekologııalyq ınspektor kásipkerlerge qatysty zańsyz 87,9 mln. teńge mólsherinde shyǵyndy óteý týraly talap qoıǵan,
dep habarlaıdy Astana qalasy prokýratýrasynyń baspasóz qyzmeti
«Astana qalasynyń prokýratýrasy kásipkerlik sýbektisiniń quqyǵyn qorǵady. Astana qalasynyń prokýratýrasy «TsentrStroıKomplekt NS» JShS-niń aryzy boıynsha tekserý barysynda Esil ekologııa departamentiniń osy uıymda júrgizilgen tekserý nátıjesinde, óz betinshe jer qoınaýyn paıdalanǵany úshin 87,9 mln. teńge mólsherinde shyǵyndy óteý týraly talap qoıylǵandyǵyn anyqtady. Al kompanııa basshylyǵy ákimshilik jaýapkershilikke tartylyp, olarǵa 800 myń teńgeden astam aıyppul salynǵan», - delingen habarlamada.
Prokýratýranyń málim etýinshe, onyń ústine kásipkerlerge qatysty qorshaǵan ortaǵa zııan keltirý faktisi boıynsha Astana qalasynyń Almaty aýdandyq ІІB-symen qylmystyq is qozǵalǵan.
«Alaıda, memlekettik ekologııalyq ınspektorynyń tekserý júrgizý kezinde memlekettik baqylaý jáne qadaǵalaý týraly zańnama talaptaryn óreskel buzýǵa jáne negizsiz dáleldemelerdi qoldanýǵa jol bergen, tıisinshe JShS-ke zańsyz talap qoıylyp, ákimshilik jáne qylmystyq jaýapkershilikke negizsiz tartylǵan. Qala prokýratýrasy anyqtalǵan zań buzýshylyqtar boıynsha prokýrorlyq qadaǵalaý sharalaryn qoldanyp, nátıjesinde barlyq ákimshilik jáne qylmystyq ister qysqartylyp, engizilgen uıǵarym men talap keri qaıtaryldy», - dep habarlaıdy vedomstvonyń baspasóz qyzmeti.
Departamenttiń jaýapty qyzmetkeri qatań tártiptik jaýapkershilikke tartyldy.
