Ekologııalyq aqparattardyń qoljetimdiligi memlekettik qyzmet tizimine engizildi

Bul týraly búgin Astanada «Aqparatqa kirý, sheshimder qabyldaý úrdisine jurtshylyqtyń qatysýy jáne qorshaǵan ortaǵa qatysty máseleler boıynsha sot ádildigine qol jetkizý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn talqylaý barysynda QR Qorshaǵan ortany qorǵaý jáne sý resýrstary vıtse-mınıstri Bektas Muhamedjanov málim etti.

«Zań jobasy óte mańyzdy, sebebi ol memleket qyzmetiniń ózekti máselelerin qozǵaıdy. Memlekettik qupııalardan ózge, mamandardyń pikirinshe, qoǵamǵa jarııalanbaýy tıis suraqtar bar. Sondyqtan bizge qalyń jurtshylyqqa qoljetimdi bolýy tıis jáne qupııa saqtalýy qajet aqparattardy anyqtaý qajet. Bıyl ekologııalyq qor aıasynda aqparattardyń jarııalylyǵy memlekettik qyzmet tizimine engizildi jáne kelesi jyldan bastap ol qarjylandyryla bastaıdy. Aqparattardyń qoljetimdiligin qajetti deńgeıde qamtamasyz ete alamyz degen senimdemin», - dedi vıtse mınıstr.

Vıtse-mınıstrdiń aıtýynsha, atalmysh zań jobasy Orhýs konventsııasyn iske asyrý josparyna sáıkes jasalyp jatqan is-qımyldardy júıege keltiredi. Sondyqtan Orhýs konventsııasyn júzege asyrýdaǵy ákimshilik jáne quqyqtyq máselelerdi talqylap, ol túıtkilderdi azamattyq qoǵam jáne halyqaralyq uıymdardyń birlesýimen sheshýdiń josparlanyp jatqanyn jetkizdi.

Orhýs konventsııasy - aqparatqa kirý, sheshimder qabyldaý úrdisine jurtshylyqtyń qatysýy jáne qorshaǵan ortaǵa qatysty máseleler boıynsha sot ádildigine qol jetkizý máselelerin qamtıtyn halyqaralyq kelisim. Oǵan álemniń 46 eli 1998 jyly Danııanyń Orhýs qalasynda ótken otyrysta qol qoıǵan. Qazaqstan bul konventsııany 2000 jyly ratıfıkatsııalady.