Ekologııalyq aktsııa: Aqmola oblysynda 13 myń aǵash otyrǵyzyldy
KÓKShETAÝ. QazAqparat –Aqmola oblysynda jalpy respýblıkalyq ekologııalyq aktsııasy ótti, dep habarlaıdy QazAqparat tilshisi.
Aqmola oblystyq ishki saıasat basqarmasynyń málimetinshe, búkil respýblıka boıynsha uıymdastyrylǵan «#Birge #JasylQazaqstan» aktsııasyna aqmolalyqtar da bir kisideı atsalysty.
Kókshetaýlyqtar Saryarqa shaǵyn aýdanyna jınalyp aǵash kóshetteri otyrǵyzsa, Atbasar qalasynda aýdanǵa jumys saparymen barǵan aımaq basshysy Ermek Marjyqpaev aǵash otyrǵyzý sharasyna qatysty. Aımaq basshysy sharanyń ekologııalyq mádenıetti saqtaýdaǵy mańyzdylyǵyna toqtaldy.
«Búgin memlekettiń basty mindetteriniń biri- resýrstardy tıimdi paıdalaný bolyp tabylady. Osy maqsatta búgin búkil respýblıka boıynsha dástúrli túrde kógaldandyrý aktsııasy ótýde. Buǵan aqmolalyqtar ózinshe úles qosýda»,- dep atap ótti Atbasar qalasynda aǵash otyrǵyzý sharasyna qatysqan aımaq basshysy Ermek Marjyqpaev.
Aıta ketý kerek, jalpy respýblıkalyq ekologııalyq aktsııasy sheńberinde Aqmola oblysynda 13 myń aǵash otyrǵyzyldy. Onyń ishinde bir ǵana Atbasar aýdanynda jyl basynan beri 700 astam aǵash otyrǵyzylǵan.
