Ekologııalyq tártipti baqylaý úshin 1,4 myńǵa jýyq mobıldi top jumys isteıdi
ASTANA. KAZINFORM – Zańsyz qoqys oryndaryn joıý jumystary da turaqty júrgizilip otyr. Birlesken sharalar nátıjesinde 248 zańsyz qoqys orny anyqtalyp, tıisti organdarǵa joldanǵan materıaldar negizinde 153 qoqys orny joıyldy. Bul jumystar eldi mekenderdiń sanıtarlyq jaǵdaıyn jaqsartýǵa múmkindik berdi.
— Jyly maýsymnyń kelýimen Qazaqstan turǵyndary bos ýaqytyn tabıǵat aıasynda — demalys oryndarynda, saıabaqtarda, ózen-kólderdiń jaǵasynda jıi ótkize bastaıdy. Pıknık jasaý, týrıstik saparlarǵa shyǵý jáne otbasymen demalý jaz mezgiliniń ajyramas bóligine aınalady. Alaıda tabıǵatqa shyǵýmen birge demalys oryndarynda qalatyn qoqys máselesi de ózekti bola túsedi.
Plastıkalyq bótelkeler, paketter, bir rettik ydystar, shyny qaldyqtar tabıǵattyń kórkin buzyp qana qoımaı, qorshaǵan ortaǵa úlken zııan keltiredi. Keıbir qaldyqtar uzaq jyldar boıy joıylmaı, topyraq pen sý kózderin lastaıdy. Al shyny bótelkeler adamdar men janýarlarǵa qaýip tóndirip, ystyq kúnderi órttiń shyǵýyna sebep bolýy múmkin.
Tabıǵatty qorǵaý úlken isterden emes, kúndelikti qarapaıym áreketterden bastalady. Demalystan keıin ár adam ózinen keıin qalǵan qoqysty jınap, arnaıy oryndarǵa tastaýy kerek. Bul — tabıǵatqa degen qurmettiń jáne azamattyq jaýapkershiliktiń belgisi, — delingen habarlamada.
Qazaqstanda ekologııalyq mádenıetti qalyptastyrý baǵytynda aýmaqtyq ekologııa departamentteri turaqty jumystar atqaryp keledi. Mamandar turǵyndarmen kezdesýler ótkizip, qorshaǵan ortany qorǵaý, qaldyqtardy durys basqarý jáne tabıǵatty lastamaý týraly túsindirý jumystaryn júrgizedi. Sonymen qatar mektepter men joǵary oqý oryndarynda dárister ótkizilip, ekologııalyq aktsııalar men túrli qoǵamdyq is-sharalarǵa qatysady.
Halyqpen aqparattyq jumystar júrgizý barysynda mamandar tabıǵatqa uqypty qaraýdyń mańyzyn túsindirip, ekologııalyq talaptardy saqtaý qajettigin aıtady. Sondaı-aq qorshaǵan ortany lastaǵan jaǵdaıda zań boıynsha jaýapkershilik qarastyrylǵanyn eskertedi. Bul jumystar volonterlermen, qoǵamdyq uıymdarmen jáne jergilikti atqarýshy organdarmen birlesip júzege asyrylady.
Ekologııalyq mádenıetti arttyrýda «Taza Qazaqstan» respýblıkalyq baǵdarlamasynyń mańyzy zor. Bul bastama aıasynda memlekettik organdar, uıymdar jáne belsendi azamattar birigip, eldi mekenderdi tazartý, zańsyz qoqys oryndaryn joıý jáne tabıǵı aýmaqtardy qorǵaý baǵytynda jumystar júrgizýde.
Qorshaǵan ortanyń tazalyǵyn qamtamasyz etýge Іshki ister mınıstrligi de atsalysyp keledi. Polıtsııa qyzmetkerleri Ekologııa departamentteriniń qyzmetkerlerimen reıdter ótkizip, qoǵamdyq oryndardy lastaý, abattandyrý talaptaryn buzý faktilerin anyqtaıdy. Sonymen qatar quqyq buzýshylyqtardyń aldyn alý jáne turǵyndardyń jaýapkershiligin arttyrý baǵytynda jumystar júrgizedi.
Tabıǵatty lastaǵany úshin tek ekologııalyq zııan emes, zań aldynda jaýapkershilik te qarastyrylǵan. Qazaqstan zańnamasyna sáıkes qoǵamdyq oryndardy, saıabaqtardy, sý aıdyndaryn jáne basqa da aýmaqtardy lastaǵan azamattarǵa aıyppul salynýy múmkin.
QR ІІM málimeti boıynsha, jyl basynan beri sanıtarlyq jáne ekologııalyq talaptardy buzýǵa baılanysty 177 myńnan astam ákimshilik quqyq buzýshylyq anyqtalǵan.
Zańsyz qoqys oryndaryn joıý jumystary da turaqty júrgizilip otyr. Birlesken sharalar nátıjesinde 248 zańsyz qoqys orny anyqtalyp, tıisti organdarǵa joldanǵan materıaldar negizinde 153 qoqys orny joıyldy. Bul jumystar eldi mekenderdiń sanıtarlyq jaǵdaıyn jaqsartýǵa múmkindik berdi.
Qazirgi tańda ekologııalyq tártipti baqylaý úshin elimiz boıynsha 8 myńnan astam polıtsııa qyzmetkeri jumyldyrylyp, 1,4 myńǵa jýyq mobıldi top jumys istep jatyr. Olardyń maqsaty — tek zań buzýshylyqtardy anyqtaý emes, sonymen qatar aldyn alý jumystaryn júrgizip, halyqtyń ekologııalyq jaýapkershiligin arttyrý.
Taza qorshaǵan orta — ár adamnyń kúndelikti jaýapkershiliginiń nátıjesi. Tabıǵatta tártip saqtaý, ekologııalyq aktsııalarǵa qatysý jáne tabıǵı resýrstarǵa uqypty qaraý arqyly Qazaqstannyń ásem tabıǵatyn saqtap, bolashaq urpaqqa qolaıly orta qaldyra alamyz.
Aıta ketelik TazaQala platformasy arqyly 865 zańsyz qoqys úıindisi anyqtalǵany týraly jazǵan edik.
