Ekologııalyq talapty buzǵan munaı kompanııalaryna aıyppul salyndy

ASTANA. KAZINFORM – Sońǵy úsh jylda Qazaqstanda ekologııalyq zańnamany buzǵany úshin kásiporyndarǵa aıtarlyqtaı kólemde aıyppul salyndy. Bul týraly Senat depýtaty, Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Olga Býlavkına aıtty.

Atap aıtqanda, Atyraý oblysyndaǵy birqatar kásiporynǵa iri aıyppuldar salynǵan:

− «Oxygenator» JShS 13 568 tonna munaı qaldyǵyn ekologııalyq ruqsatsyz kádege jaratqany úshin 37,4 mlrd teńge;

− «Kaspıı Neft» AQ qajetti qujattarsyz qaldyqtardy saqtaǵany úshin 13,7 mlrd teńge;

− «Karabatan Utility Solutions» JShS (Samuryq-Qazyna qurylymyna kiredi) – bólingen kómirtek kvotalaryn arttyrǵany úshin 7,2 mlrd teńge;

− «Teńizshevroıl» JShS ruqsat etilgen shekterden asatyn zııandy zattardy shyǵarǵany úshin 2,8 mlrd teńge;

− «Kohan» AQ – ekologııalyq ruqsatsyz qaýipti qaldyqtardy jınaqtaǵany úshin 9,5 mlrd teńge;

− NCOC (North Caspian Operating Company) – tazartylmaǵan aǵyn sýlardy aǵyzǵany úshin 196 mln teńge, al fakel gazyn jaǵý normatıvterin buzǵany úshin 12 mlrd teńge aıyppul aldy.

− «Jan ı KS» JShS ekologııalyq talaptarǵa saı kelmeıtin qaldyqtardy saqtaǵany úshin 3 mlrd teńge aıyppul aldy.

− «Dala-Ekos» JShS qaýipti qaldyqtardy zańsyz jınap, óńdegeni úshin 3 mlrd teńge aıyppul salyndy.

Sonymen birge, Shyǵys Qazaqstan oblysynda «Qazmyrysh» JSh ekologııalyq talaptardy buzǵany úshin 49,6 mln teńge aıyppul aldy.

Qyzylorda oblysynda Beıneý-Shymkent gaz qubyryna ekologııalyq buzýshylyqtar úshin 523 mln teńge aıyppul salynǵan.

Abaı oblysynda «EKO-Semeı» JShS qorshaǵan ortany lastaǵany úshin 296 mln teńge aıyppulmen jazalandy.

Aıyppuldardyń negizgi sebepteri – normatıvten tys zııandy shyǵaryndylar, ekologııalyq ruqsattyń bolmaýy, zańsyz qoqys alańdary men qaldyqtardy kádege jaratý, sý resýrstaryn lastaý bolyp otyr.

Aıta ketý kerek, qoldanystaǵy zańnamaǵa sáıkes, árbir kásiporyn qaldyqtardy basqarý baǵdarlamasyn ázirleýge mindetti. Bul baǵdarlama qaldyqtardyń kólemin barynsha azaıtý maqsatynda eń ozyq qoljetimdi tehnologııalardy paıdalanýdy eskerýi tıis.

Buǵan deıin sarapshy Gúlmıra Ismaǵulova Qazaqstandaǵy lastanǵan aýa qaterli isik pen týabitti aýrýlardy kóbeıtkenin aıtqan edi.