Ekologııalyq talaptardy buzǵany úshin Pavlodarda 8 ákim aıyppul tóledi
ASTANA. KAZINFORM — Prokýratýra júrgizgen taldaý nátıjesinde Aqqýly aýdanynyń aýmaǵynda qatty turmystyq qaldyqtardyń jıyrmadan astam polıgony anyqtaldy, olardyń eshqaısysynda qorshaǵan ortaǵa emıssııalarǵa ruqsat joq. Bul týraly Pavlodar oblysynyń prokýratýrasy málim etti.
Ekologııalyq kodekstiń 13-babynyń 4-tarmaǵyna sáıkes tabıǵatty saqtaý jáne onyń resýrstaryna uqypty qaraý barlyq jeke jáne zańdy tulǵalardyń paryzy.
Ekologııalyq-sanıtarııalyq talaptarǵa sáıkessizdikter anyqtaldy, sondaı-aq normatıvtik-tehnıkalyq qujattamanyń joqtyǵy, qorshaǵan ortaǵa teris áserdiń aldyn alý úshin jınaqtalǵan qaldyqtardan túziletin fıltrat pen aǵyn sýlardy baqylaý júıesiniń jolǵa qoıylmaǵany belgili boldy.
Ózdiginen paıda bolǵan polıgondar qoqys gazynyń shyǵaryndylaryn baqylaý júıesimen jabdyqtalmaǵan.
Anyqtalǵandaı, olar kommýnaldyq qaldyqtardy baqylaýsyz ornalastyrý saldarynan paıda bolǵan.
Óz kezeginde jergilikti atqarýshy organdar tarapynan kommýnaldyq qaldyqtardy basqarý kezinde ekologııalyq talaptardyń saqtalýy qamtamasyz etilmegen.
Nátıjesinde segiz aýyldyq okrýgtiń ákimderi ákimshilik jaýaptylyqa tartyldy.
Jalpy somasy 1,7 mln teńge kóleminde aıyppuldar tólendi.
