Ekologııalyq sammıt: Sý salasynda Qazaqstan 3 memorandým men 1 jol kartasyna qol qoıdy
ASTANA. KAZINFORM — Astanada ótken Óńirlik ekologııalyq sammıttiń qorytyndysy boıynsha Sý resýrstary jáne ırrıgatsııa mınıstrligi sheteldik seriktestermen úsh memorandým jáne bir yntymaqtastyq jol kartasyna qol qoıdy. Slovakııa Respýblıkasynyń Qorshaǵan orta mınıstrligimen ózara túsinistik jáne yntymaqtastyq týraly memorandým jasaldy. Bul týraly vedomstvonyń baspasóz qyzmeti málim etti.
Óńirlik ekologııalyq sammıt aıasynda 21 otyrys jáne 12 ekijaqty kezdesý barysynda Sý resýrstary jáne ırrıgatsııa mınıstrligi úsh memorandým men bir yntymaqtastyq jol kartasyna qol qoıdy.
Mınıstrliktiń málimetinshe, qujat sý sharýashylyǵy ınfraqurylymyn jańǵyrtý, sý resýrstaryn tıimdi paıdalaný, bilikti kadrlardy birlesip daıarlaý, gıdrotehnıkalyq nysandardyń tehnıkalyq jaı-kúıin monıtorıngteý, sý tasqyny men qurǵaqshylyqtyń aldyn alý baǵyttarynda ekijaqty ózara is-qımyldy nyǵaıtýdy kózdeıdi.
— Halyqaralyq sý resýrstaryn basqarý ınstıtýtymen de ózara túsinistik týraly memorandýmǵa qol qoıyldy. Qujat birlesken jobalardy iske asyrýdy, sondaı-aq zertteý, monıtorıng jáne jerústi jáne jerasty sýyn basqarý, onyń ishinde transshekaralyq sý resýrstary salasynda tájirıbe, aqparat jáne ozyq tájirıbeler almasýdy qarastyrady, — dep habarlady vedomstvodan.
Germanııanyń Táýelsiz qorshaǵan orta ınstıtýtymen qol qoıylǵan memorandým birlesken jobalardy ázirleý men ǵylymı zertteýler júrgizýdi qamtıdy. Frantsýz damý agenttigi uıymdastyrǵan plenarlyq sessııa qorytyndysy boıynsha Hydroplus kompanııasymen halyqaralyq yntymaqtastyqtyń jol kartasyna qol qoıyldy.
— Qujat Qazaqstan aýmaǵynda pılottyq jobalardy iske asyrýdy, sondaı-aq sý salasy mamandarynyń biliktiligin arttyrý sharalaryn qamtıdy. Jalpy alǵanda, RES 2026 aıasynda Sý resýrstary jáne ırrıgatsııa mınıstrligi mamandary 21 plenarlyq sessııa men dóńgelek ústelge qatysty. Olardyń qatarynda vedomstvonyń qatysýymen uıymdastyrylǵan «Klımattyń ózgerýi jaǵdaıynda Ortalyq Azııada sý resýrstaryn paıdalaný tıimdiligin arttyrý» atty paneldik sessııa jáne «Halyqaralyq sý uıymyn qurý máseleleri boıynsha dóńgelek ústel formatyndaǵy konsýltatsııalar» atty joǵary deńgeıdegi sessııa bar, — delingen mınıstrliktiń habarlamasynda.
Sammıt aıasynda sondaı-aq QR Prezıdenti Qasym-Jomart Toqaevtyń tóraǵalyǵymen Halyqaralyq Araldy qutqarý qorynyń quryltaıshy memleketter basshylary keńesiniń otyrysy ótti. Іs-shara qorytyndysynda birqatar mańyzdy qujatqa qol qoıylyp, 26 naýryzdy Aral teńizi, Ámýdarııa jáne Syrdarııa ózenderiniń halyqaralyq kúni dep jarııalaý týraly sheshim qabyldandy.
Sý resýrstary jáne ırrıgatsııa mınıstrligi halyqaralyq uıymdar men damý agenttikteriniń basshylary jáne ókilderimen 12 ekijaqty kezdesý ótkizdi. Olardyń qatarynda BUU Damý baǵdarlamasy, BUU Azyq-túlik jáne aýyl sharýashylyǵy uıymy, BUU Eýropalyq ekonomıkalyq komıssııasy, BUU-nyń Apattar qaýpin azaıtý jónindegi basqarmasy, Ekonomıkalyq yntymaqtastyq jáne damý uıymy, EQYU Parlamenttik assambleıasy jáne basqa da uıymdar bar. Kezdesýlerde Memleket basshysynyń Halyqaralyq sý uıymyn qurý jónindegi bastamasyn iske asyrý, Qazaqstannyń sý sharýashylyǵyna ınvestıtsııa tartý, pılottyq jobalar men birlesken baǵdarlamalardy ázirleý jáne júzege asyrý, sý dıplomatııasyn damytý, klımattyń ózgerýine beıimdelý jáne tabıǵı apattarǵa qarsy is-qımyl máseleleri qarastyryldy.
— Óńirlik ekologııalyq sammıt sý resýrstaryn basqarýdyń jańa tásilderin birlesip ázirleý maqsatynda ǵylymdy, ınnovatsııany, bıznesti jáne halyqaralyq qaýymdastyqty biriktiretin tıimdi alań retinde ózin dáleldep úlgerdi. Kelissózder barysynda sheteldik seriktester sammıttiń joǵary deńgeıde uıymdastyrylǵanyn, sondaı-aq Qazaqstannyń ekologııalyq jáne sý qaýipsizdigi máselelerindegi belsendi ustanymyn atap ótti. Bul elimizdiń jahandyq úderisterdiń qatysýshysy ǵana emes, álemdik ekologııalyq saıasattaǵy úrdisterdi aıqyndaıtyn el ekenin kórsetedi — dedi Sý resýrstary jáne ırrıgatsııa mınıstri Nurjan Nurjigitov.
Atalǵan sammıt aıasynda Túrikmenstan Prezıdenti sý resýrstary boıynsha óńirlik keńes qurýdy usynǵan bolatyn.
