Ekologııalyq máseleler týraly Telegram-bot halyqtyń 22 myń aryz-shaǵymyn qabyldaǵan
ASTANA. KAZINFORM – Byltyr Telegram-da iske qosylǵan @TazaQazBot turǵyndardyń 22 myń shaǵymyn qabyldady, onyń 21 myńnan astamy oryndaldy. Bul kórsetkishter týraly QR Ekologııa jáne tabıǵı resýrstar vıtse-mınıstri Mansur Oshýrbaev aıtyp berdi.
Vıtse-mınıstr azamattarda ekologııalyq quqyqbuzýshylyqtarǵa múldem tózbeýshilik qalyptastyrýdyń mańyzyn atap ótti.
− Osy maqsatta biz tsıfrlyq tehnologııalardy paıdalanyp kelemiz. Ótken jyly Telegram-da iske qosylǵan @TazaQazBot turǵyndardyń ekologııalyq máseleler men abattandyrý máselelerin jedel sheshýge qanshalyqty ońaı qatysa alatynyn kórsetti. Bot iske qosylǵaly 22 myń shaǵym túsken, onyń 21 myńnan astamy oryndaldy. Qazirgi ýaqytta 242 shaǵym qaralyp jatyr. 2025 jyly 12 myńnan astam shaǵym qabyldandy, onyń 11 myńnan astamy oryndalǵan, - dedi M. Oshýrbaev Prezıdent janyndaǵy Ortalyq kommýnıkatsııalar qyzmetinde ótken brıfıngte.
Turǵyndar kóbinese aýmaqty tazartý qajettigi (3 617), qoqys shyǵarý (873), kóshelerdi abattandyrý men trotýarlardy kútip-ustaý kerektigi (867) jóninde habarlaǵan.
− Ótinishterdiń mundaı kóptigi halyqtyń ekologııalyq máselege beı-jaı qaramaıtynyn jáne taza ári jaıly Qazaqstan qurýǵa belsendi qatysyp jatqanyn aıqyn dáleldeıdi. Bul «Taza Qazaqstan» bastamasy halyq arasynda qoldaý tapqanyn jáne azamattardyń qorshaǵan ortaǵa jaýapkershilikpen qaraýǵa daıyn ekenin kórsetedi, - dedi M. Oshýrbaev.
Eske sala ketsek, «Taza Qazaqstan» aktsııasy aıasynda ótken jyldan beri el boıynsha 1,4 mln tonna qaldyq jınalyp, 2,4 mln aǵash otyrǵyzyldy. Aktsııaǵa shamamen 9 mln adam qatysqan, onyń ishinde 450 myń erikti bar.