Ekologııalyq másele sheshimin tapty: Stepnogorskidegi qaldyqtar jańa keshenge kóshiriledi
KÓKShETAÝ. KAZINFORM — Búgingi tańda Aqmola oblysynyń Birjan Sal aýdanynda tońazytqysh jáne klımattyq jabdyqty qaıta óńdeıtin, sondaı-aq turaqty organıkalyq lastaǵyshtardy, onyń ishinde PHD-qaldyqtardy termııalyq jolmen joıatyn arnaıy óndiristik keshenniń qurylysy aıaqtalýǵa jaqyn. Stepnogorsk qalasyndaǵy PHD-qaldyqtar sol jerge jetkizilmek, dep jazdy Kazinform agenttiginiń óńirdegi tilshisi.
2020 jyly Balqashtan Stepnogorskke PHD-qaldyqtar jetkizilgennen keıin, jergilikti turǵyndar birneshe ret óz qaýipsizdikteri jaıly másele kótergen. Olar bul máseleni oblys pen respýblıka deńgeıinde qozǵap, Prezıdentke úndeý hat joldap, qol jınaǵan.
Prezıdent olardyń únin estip, 2023 jyly Aqmola oblysyna jumys sapary barysynda PHD-qaldyqtardy joıatyn zaýyt salý týraly tapsyrma bergen, biraq ol zaýyt Stepnogorskte emes, basqa jerde boı kóterýi kerek bolǵan.
Arada ýaqyt ótti. Stepnogorsk turǵyndary qalalarynda onsyz da kúrdeli ekologııalyq jaǵdaı ýshyqpaýy úshin bul qaldyqtardan arylýǵa úmitterin úzgendeı boldy. Osyǵan oraı Kazinform redaktsııasy Prezıdent tapsyrmasynyń oryndalý barysyn anyqtaýdy uıǵardy.
Qazaqstan Respýblıkasynyń Ekologııa jáne tabıǵı resýrstar mınıstrligi Kazinform-nyń suraýyna jaýap bere otyryp, 2020 jyly burynǵy «Darıal-Ý» áskerı bazasynda saqtalǵan kondensatorlar jańa, BUU sertıfıkattaǵan metall bóshkelerge qaıta oralyp, Balqashtan Stepnogorsk qalasyndaǵy arnaıy qoımaǵa jetkizilgenin habarlady.
— Qoıma QR Ekologııa, geologııa jáne tabıǵı resýrstar mınıstriniń 2022 jylǵy 24 qarashadaǵy № 717 buıryǵymen bekitilgen «Turaqty organıkalyq lastaǵyshtarmen jáne olardy qamtıtyn qaldyqtarmen jumys isteý erejeleriniń» 3 jáne 4-paragraftaryna sáıkes jabdyqtalǵan. Bul qoımadaǵy ekologııalyq zańnamanyń saqtalýyna Aqmola oblysynyń ekologııa departamenti memlekettik baqylaý aıasynda monıtorıng júrgizip otyrady, — dep túsindirdi mınıstrlik.
Prezıdent tapsyrmasyna sáıkes, PHD-qaldyqtardy joıýǵa arnalǵan kásiporyn salý boıynsha Mınıstrlik qaldyqtardy qaýipsiz tasymaldaý men keıingi joıý jumystaryn júıeli túrde júrgizip jatqanyn atap ótti.
— Qazirgi ýaqytta Aqmola oblysy Birjan Sal aýdanynda tońazytqysh jáne klımattyq jabdyqty qaıta óńdeıtin, turaqty organıkalyq lastaǵyshtardy, sonyń ishinde PHD-qaldyqtardy termııalyq jolmen joıatyn arnaıy keshenniń qurylysy aıaqtalýda. Bul keshen jeke seriktes — «EkoLıýks-As» JShS esebinen, BUU-nyń GEF, ıÝNIDO sııaqty halyqaralyq uıymdarynyń tehnıkalyq qoldaýymen júzege asýda. Qajetti qural-jabdyqtar Qazaqstanǵa jetkizilip, kedendik rásimder aıaqtaldy, birinshi kezeńniń ǵımarattary men ınfraqurylymy daıyn, — dedi mınıstrlik ókilderi.
Infraqurylym qurylysy aıaqtalý satysynda. Qaldyqtardy tasymaldaý 2025 jyldyń qyrkúıek–qazan aılarynda qabyldaý alańy daıyn bolǵannan keıin bastalmaq.
— Qaldyqtardy joıý jumysy 2025 jyldyń sońynda iske qosý-baptaý jumystary aıaqtalǵan soń josparlanyp otyr. Bul másele Mınıstrliktiń erekshe baqylaýynda, — delingen resmı jaýapta.
Eske sala keteıik, 2022 jyly Stepnogorsktegi PHD-qaldyqtar týraly suraqqa jaýap bergende, Mınıstrlik halyqqa qaýip joq ekenin málimdegen edi. Sondaı-aq PHD-qaldyqtaryn óńdeıtin zaýyt Birjan Sal aýdanynda salynýy múmkin degen aqparat jarııalanǵan bolatyn.
Al 2020 jyly Ekologııa mınıstrligi Stepnogorskide PHD-qaldyqtaryn ýtılızatsııalaý zaýyty bolmaıdy degen edi.
Jalpy elimizde qaldyqty qaıta óńdeý jobalary nege baıaý atqarylatynyn Ekologııa mınıstri túsindirgen bolatyn.