Ekologııalyq mádenıet pen qoǵamdyq tártip qatar damýy kerek — Prezıdent
QONAEV. KAZINFORM – Memleket basshysy zań men tártipke qurmetpen qaraý – eń aldymen jaýapkershilik sezimi joǵary azamattarǵa tán aıryqsha bolmys ekenin aıtty. Bul týraly Aqordanyń baspasóz qyzmeti habarlady.
— Osy tusta men «Taza Qazaqstan» tujyrymdamasyna baılanysty taǵy da atap ótkim keledi. Qalalar men aýyldardy kórkeıtý, aýmaqtardy kógaldandyrý jumysyna árdaıym erekshe mán berý qajet. Sondaı-aq ekologııalyq mádenıetti kóterý máselesine kóńil bólgen jón. Ásirese, adamdardyń týrıstik nysandar men tabıǵat aıasyndaǵy tártibine aıryqsha nazar aýdarý mańyzdy. Tártip buzǵandardy, ıaǵnı, vandaldardy zańǵa sáıkes jaýapqa tartý qajet. Bir sózben, quqyqtyq nıgılızmge qoǵam bolyp qarsy turýymyz kerek. Zań men tártipke qurmetpen qaraý degenimiz — jazadan qorqý emes, bul — eń aldymen jaýapkershilik sezimi joǵary azamattarǵa tán aıryqsha bolmys. Osy mańyzdy dúnıeni durys túsingen jón, — dedi Memleket basshysy.
Qasym-Jomart Toqaev áskerı qaqtyǵysqa toly zamanda elimizge tatýlyq pen turaqtylyq aýadaı qajet ekenin taǵy bir márte eske saldy.
— Qazirgi bulyńǵyr, áskerı qaqtyǵysqa toly zamanda elimizge tatýlyq pen turaqtylyq aýadaı qajet. Onsyz eshqandaı reforma, jalpy oń ózgeris bolmaıdy. Sondyqtan quqyq qorǵaý mekemeleri zań buzýshylyqtarǵa qatań sharalar men jazalardy qoldanýy kerek.
Keıbir elimizdi jaqtyrmaıtyn, mensinbeıtin kisiler, ókinishke qaraı, solardyń ishinde Parlament depýtattary bar, quqyqtyq áreketterimizdi «Shtrafstan», «Aıyppulstan» dep ataıdy eken. Meıli, óz oılarynyń kelteligin kórsete bersin.
Al halqymyzǵa qoǵamdyq tártip pen qaýipsizdik kerek. Sondyqtan biz osy joldan taımaımyz, batyl túrde «Zań men tártip» saıasatyn júrgizemiz. Sebebi bul — halqymyzdyń talaby, halqymyzdyń suranysy. Búkil qoǵam da, ákimder de bul máselege basa nazar aýdarýy kerek, — dedi Toqaev.
Aıta ketelik Toqaev Alataýdyń áleýmettik ınfraqurylymyn kúsheıtýdi tapsyrǵan edi.
