Ekologııalyq qozǵalys Energetıka mınıstrligi men munaı kompanııalaryn sotqa berdi
ASTANA. KAZINFORM — «Save the Caspian Sea» jahandyq ekologııalyq qozǵalysy Qazaqstannyń Energetıka mınıstrligi men munaı kompanııalaryna qarsy sot isin bastady.
Qozǵalystyń negizin qalaýshy Vadım Nı Ónimdi bólý týraly kelisimderdiń (ÓBK) jarııalanýyn talap etýde.
− Biz Kaspıı teńizi úshin asa mańyzdy kezeńdemiz. Bizdiń qoǵam jyldar boıy munaı óndirý qyzmetin retteıtin Ónimdi bólisý týraly kelisim sharttarynan beıhabar bolyp keldi. Kaspıı teńizine artylǵan júkteme saldaryn, teńizdiń birtindep ólip bara jatqanyn qazirdiń ózinde kórip otyrmyz, alaıda oǵan jaýapty tarap joq. Sondyqtan biz qazir ǵalymdar men sarapshylardyń kómegimen Kaspıı máselesin qoǵamǵa, memlekettik organdarǵa túsinikti ári aıqyn etý úshin jumys júrgizip jatyrmyz. Sondaı-aq ártúrli elder arasynda dıalog ornatyp, tek Qazaqstan ishinde ǵana emes, Kaspıı mańy memleketteri deńgeıinde de ortaq sheshim tabýdy kózdeımiz, − dedi V. Nı elordada ótken dóńgelek ústelde.
Spıkerdiń aıtýynsha, qańtar aıynyń ortasynda Qarashyǵanaq, Qashaǵan jáne Teńiz ken oryndary boıynsha Ónim bólisý kelisimindegi ekologııalyq aqparatty ashý týraly suranys jiberilgen.
Aqpan aıynyń basynda Úkimet bul aqparattyń qupııalylyǵyn saqtaý boıynsha kepildik bergenin jáne olardyń jazbasha kelisimi qajet ekenin alǵa tartyp, suranysty keri qaıtarǵan.
− Árıne, bul ýájben kelispeımiz, sebebi ol qazirgi halyqaralyq ekologııalyq quqyqqa jáne Qazaqstan Konstıtýtsııasynyń 6-babyna qaıshy keledi, onda tabıǵı resýrstar men jer qoınaýy Qazaqstan halqyna tıesili dep jazylǵan. Biz bul sheshimdi sotta daýlaımyz jáne keshe ákimshilik shaǵym túsirdik. Ári qaraı osy aqparatty ashý máselesin ákimshilik sot arqyly qaraýdy talap etemiz, eger qajet dep tapsa, sot bul isti Konstıtýtsııalyq sotta qaraý protsesine bastamashy bolýy múmkin. Eger ondaı múmkindik bolmasa, halyqaralyq ınstantsııalarǵa júginý quqyǵymyz bar, − deıdi qozǵalys basshysy.
Qozǵalys ókili bul aqparattyń ashyqtyq rejımin qamtamasyz etetinin, oǵan sala sarapshylaryn tartýǵa bolatynyn jáne máselege qyzyǵýshylyqty arttyratynyn aıtýda.
− Bul tek Úkimet pen munaı kompanııalary arasyndaǵy ekijaqty qarym-qatynas bolýdan qalady. Memleket basshysy aıtqandaı, ÓBK qaıta qaralsa, ádil kelisimge qol jetkizý úshin saraptamalyq kómek, sarapshylardyń baǵalaýy men usynystary óte mańyzdy bolady. Bizdiń oıymyzsha, bul kelisimge ekologııalyq talaptardy engizý asa mańyzdy, ári bul talaptar biz úshin ashyq bolýy kerek, sonda biz olardyń oryndalýyn tolyqtaı qadaǵalaı alamyz, − dep túıindedi Vadım Nı.
Dóńgelek ústel qatysýshylary munaı óndiretin kompanııalardy Kaspıı ekojúıesin qorǵaýǵa barynsha jaýapkershilikpen qaraýǵa shaqyrdy. Búginde Kaspıı klımattyq, ekologııalyq jáne ekonomıkalyq daǵdarystarǵa tap boldy. Sý deńgeıi asqan jyldamdyqpen tómendep keledi. Ekologııa jáne tabıǵı resýrstar mınıstrliginiń habarlaýynsha, sońǵy 20 jylda sý keminde 2 metrge azaıdy.
Al 2024 jyly Kaspııdiń Qazaqstan bóliginde sý deńgeıi 2023 jylmen salystyrǵanda 26 sm-ge tómendegen.
Prezıdent Qasym-Jomart Toqaev Úkimettiń keńeıtilgen otyrysynda jer qoınaýyn paıdalanýda reforma esh kedergige qaramastan jalǵasýy kerek ekenin aıtqan edi.
Energetıka mınıstrligi aldaǵy 2-3 jylda ónimdi bólý týraly kelisimderdi (ÓBK) uzartý boıynsha sheteldik ınvestorlarmen kelissózder júrgizbek.