Ekologııalyq qaýipsizdik konstıtýtsııalyq basymdyq retinde bekitiledi
ASTANA. KAZINFORM — Premer-mınıstrdiń birinshi orynbasary Roman Sklıardyń tóraǵalyǵymen Ekologııa jáne tabıǵı resýrstar mınıstrliginiń alqa májilisi ótti, onda 2025 jylǵy jumystyń qorytyndylary shyǵarylyp, 2026 jylǵa arnalǵan mindetter aıqyndaldy.
Alqaǵa Qazaqstan Respýblıkasy Parlamenti palatalarynyń depýtattary, Prezıdent Ákimshiliginiń, Úkimet Apparatynyń jaýapty qyzmetkerleri, ortalyq jáne jergilikti atqarýshy organdardyń, kvazımemlekettik sektordyń, aýmaqtyq bólimshelerdiń ókilderi jáne mınıstrliktiń Qoǵamdyq keńes músheleri qatysty.
Premer-mınıstrdiń birinshi orynbasary Roman Sklıar óz sózinde alqa otyrysy elimiz úshin mańyzdy oqıǵa — Qazaqstan Respýblıkasynyń jańa Konstıtýtsııasy jónindegi respýblıkalyq referendým qarsańynda ótkizilip jatqanyn atap ótti.
— Konstıtýtsııa jobasynyń usynylǵan redaktsııasynda qoǵamnyń basty suranystarynyń biri — adam ómiri men densaýlyǵy úshin qolaıly orta qurý, tabıǵatqa uqypty qaraý syndy irgeli qaǵıdatty engizý, — dedi ol.
Ekologııa jáne tabıǵı resýrstar mınıstri Erlan Nysanbaev qorshaǵan ortany qorǵaýdy qamtamasyz etý, eldiń tabıǵı resýrstaryn utymdy paıdalaný jáne kóbeıtý boıynsha negizgi jetistikterdi atap ótti.
Jetekshilik etetin baǵyttar boıynsha vıtse-mınıstrlerdiń atqarǵan jumystary týraly egjeı-tegjeıli esepter tyńdaldy.
Qazirgi ýaqytta mınıstrlik qorshaǵan ortanyń jaı-kúıin baqylaý, qoqystardy basqarý jáne qaldyqtarǵa monıtorıng júrgizý, orman órtteriniń oshaqtaryn ýaqtyly anyqtaý, orman resýrstaryn esepke alý jáne ulttyq parkterge barýdy qadaǵalaý boıynsha tsıfrlyq jobalar keshenin júzege asyrýda.
Mınıstrliktiń mańyzdy mindeti — jeke ınvestıtsııalardy tarta otyryp qaldyqtardy basqarý júıesin damytý.
Memleket basshysy BUU Bas Assambleıasynyń 78-shi sessııasynda bıyl elimizde Óńirlik ekologııalyq sammıt ótkizý týraly aıtty. Sammıt — memleketter men Úkimet basshylarynyń, halyqaralyq seriktester men sarapshylar qaýymdastyǵynyń qatysýymen ótetin mańyzdy halyqaralyq is-shara. Sammıt ótkizý Ortalyq Azııa elderiniń óńiraralyq yntymaqtastyqtaǵy áleýetin jáne onyń jahandyq klımattyq kúsh jigerdi kúsheıtýge qosqan úlesin kórsetýi tıis.
Prezıdenttiń «Taza Qazaqstan» bastamasy aýqymdy jalpyulttyq qozǵalysqa aınaldy. Aýmaqtardy jınaýdan bastap halyqtyń ekologııalyq mádenıetin arttyrýǵa baǵyttalǵan aýqymdy aǵartý jobalaryna deıin ekologııalyq is-sharalardyń keń aýqymy júzege asyrylýda.
2 mlrd aǵash otyrǵyzý jáne orman alqabyn 14,5 mln gektarǵa deıin jetkizý boıynsha aýqymdy jumystar júrgizilýde. Oń dınamıkaǵa qaramastan, jerdiń degradatsııasy men shóleıttený máseleleri bar. Bul máseleniń sheshimi — jel erozııasyn azaıtý, qumdardy bekitý jáne jaıylymdardy qalpyna keltirý úshin qorǵanys orman beldeýleri men tosqaýyl ekpeler júıesin qurý.
2025 jyly Premer-mınıstr 24 eń qaýipti orman jáne tabıǵatty qorǵaý mekemelerinde orman órtterin erte anyqtaý júıesin engizý jóninde naqty mindet qoıdy. Ótken jyly atalǵan júıe jıyntyq aýqymda 2,2 mln gektarǵa deıin jetkizildi. Sonymen qatar, oǵan jasandy ıntellekt ıntegratsııalanǵan, ol derekterdi tirkep, ony birden jedel basqarý ortalyǵyna jiberedi. Osy jyldyń sońyna deıin elimizdegi eń órtke oraný qaýpi joǵary ormandardyń 5,4 mln gektar aýmaǵy júıemen qamtylatyn bolady.
Budan basqa, 2026 jylǵa qoıylǵan mindetterdi oryndaý týraly sharalar da sóz boldy, ekologııalyq qaýipsizdikti qamtamasyz etý, bıoalýantúrlilikti saqtaý, jaýapty jáne jasampaz patrıotızmdi ilgeriletý, joǵary ekologııalyq mádenıetti qalyptastyrý boıynsha belgilengen maqsattardy júzege asyrý jóninde tapsyrmalar berildi.
Aıta ketelik Premer-mınıstr ınvestıtsııalyq saıasattyń jańa kezeńin jarııalaǵan edi.