Ekologııalyq daǵdarys jahandyq qaýipsizdikke áser etip otyr – BUU DB ókili
ASTANA. KAZINFORM – Qazirgi tańda álem ekologııalyq daǵdaryspen betpe-bet kelip otyr. Bul týraly EYU sheńberindegi ekologııalyq yntymaqtastyq platformasy boıynsha joǵary deńgeıdegi alǵashqy dıalogta BUU Damý baǵdarlamasynyń (BUUDB) Ózbekstandaǵy Turaqty ókili Akıko Fýdzıı málimdedi.
Onyń aıtýynsha, bıoalýantúrliliktiń azaıýy, qorshaǵan ortanyń lastanýy jáne klımattyń ózgerýi ózara tyǵyz baılanysty jáne ekojúıelerdiń álsireýine ákelip otyr.
— Bul úderister jahandyq ári óńirlik qaýipsizdikke áser etetin táýekelderdi kúsheıtedi. Sondyqtan mundaı syn-qaterlerdi eskerip, keshendi túrde áreket etý qajet, — dedi ol.
Spıkerdiń sózinshe, Ekonomıkalyq yntymaqtastyq uıymyna múshe elder úshin ekologııalyq saıasat ekonomıkalyq faktorlarmen tyǵyz baılanysty.
— Ekologııalyq problemalar jumys oryndarynyń qysqarýyna, naryqtaǵy turaqsyzdyqqa jáne kólik dálizderi arqyly ótetin saýda aǵyndaryna áser etýi múmkin. Bul óz kezeginde óńirdegi ekonomıkalyq turaqtylyqqa qaýip tóndiredi, — dedi Akıko Fýdzıı.
Sondaı-aq ol tabıǵı apattardy basqarýda tsıfrlyq sheshimderdiń mańyzyn atap ótti.
— Derekter almasý júıelerin damytý jáne tsıfrlyq tehnologııalarǵa negizdelgen júıelerdi engizý jedel ári tıimdi áreket etýge múmkindik beredi, — dedi BUUDB ókili.
Onyń pikirinshe, mundaı joǵary deńgeıdegi dıalog óńirlik yntymaqtastyqty kúsheıtý úshin mańyzdy.
— Búgingi talqylaý barysynda negizgi basymdyqtar aıqyndalyp, bul ózara áriptestikti odan ári nyǵaıtýǵa negiz bolady, — dep túıindedi ol.
Aıta keteıik, sammıt aıasynda Aral óńirindegi ekologııalyq ahýaldy jaqsartýǵa jáne óńirlik yntymaqtastyqty nyǵaıtýǵa baǵyttalǵan tórt mańyzdy qujatqa qol qoıyldy.
