Ekologııalyq baqylaý: 60% ónerkásip Ulttyq derekter bankine qosyldy

ASTANA. KAZINFORM – Qorshaǵan orta men tabıǵı resýrstardyń jaı-kúıi jónindegi Ulttyq derekter banki quryldy. Jańa júıege elimizdegi kásiporyndardyń 60%-y qosyldy. Bul týraly QR Ekologııa jáne tabıǵı resýrstar vıtse-mınıstri Nurlan Qurmalaev aıtty.

— Engizilgen tsıfrlyq jobalar jaıly aıtar bolsaq, birinshi joba — Qorshaǵan orta men tabıǵı resýrstardyń jaı-kúıi jónindegi Ulttyq derekter banki. Bul platforma «biryńǵaı tereze» qaǵıdaty boıynsha Ekologııalyq qordyń barlyq ınfraqurylymyna qoljetimdilikti jáne memleket, tabıǵat paıdalanýshylary men jurtshylyq arasyndaǵy tolyq ózara is-qımyldy qamtamasyz etedi. Ol mynalardy qamtıdy: emıssııalar shyǵaryndylaryn baqylaýdyń avtomattandyrylǵan júıesi; óndiristik ekologııalyq baqylaý; qaldyqtar men kómirtegi shyǵaryndylarynyń memlekettik kadastrlary; qoǵamdyq tyńdaýlar; lastaýshy zattardyń shyǵaryndylary men tasymalynyń tirkelimi, — dedi ol. 

Vıtse-mınıstr jańa júıege qazirdiń ózinde eldegi kásiporyndardyń shamamen 60%-y qosylǵanyn aıtty.

— Іri ónerkásiptik kásiporyndardyń tútin shyǵaratyn murjalaryna lastaýshy zattardyń kontsentratsııasyn anyqtap, málimetti derekter bankine beretin arnaıy datchıkter ornatylýda. Kásiporyndardyń shamamen 60%-y júıege qosyldy jáne olardan árbir 20 mınýt saıyn derekter jiberilip otyr, — dedi Nurlan Qurmalaev. 

Spıkerdiń aıtýynsha, júıe derekterdi jınap qana qoımaıdy, ol der kezinde jaǵdaıdy saraptaı alady. Zań buzýshylyq tirkelgen jaǵdaıda, atap aıtqanda, tútinniń kontsentratsııasy belgilengen lımıtten asyp ketse, ony joıý jóninde sharalar qabyldaý úshin múddeli taraptarǵa avtomatty túrde habarlama jiberedi.