Ekologııalyq aıyppuldardan túsetin qarjy aýyldyq okrýgterdiń bıýdjetine berilmek
ASTANA. KAZINFORM – Ekologııalyq aıyppuldardan túsetin túsimderdi aýyldyq okrýgterdiń bıýdjetine berý josparlanyp otyr. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Bıýdjet zańnamasyna sáıkes, qorshaǵan ortaǵa jaǵymsyz áser etkeni úshin tólenetin aqy arnaýly túsimder sanatyna jatqyzylyp, 2026 jylǵy 1 qańtardan bastap 100 % mólsherinde jergilikti bıýdjetterge, onyń ishinde oblystyq bıýdjetterge, respýblıkalyq mańyzy bar qalalar men astana bıýdjetterine esepteledi. Ekologııa jáne tabıǵı resýrstar mınıstrligi jáne onyń aýmaqtyq organdary salatyn ákimshilik aıyppuldar, ósimpuldar men sanktsııalar da oblystyq bıýdjetterge aýdarylady. Bul rette Ekologııalyq kodekstiń 29-babynyń 7-tarmaǵyna sáıkes, qorshaǵan ortany qorǵaý jónindegi is-sharalar josparlary ázirlengen jáne bekitilgen jyldyń aldyndaǵy úsh jylda jergilikti bıýdjetke túsken ekologııalyq tólemder somasynan kem bolmaıtyn kólemdegi bıýdjet qarajaty esebinen iske asyrylady, dedi Úkimet basshysy.
Onyń atap ótýinshe, 2026 jyldan bastap Bıýdjet jáne Ekologııa kodeksteriniń normalary ózara úılesedi. Al ekologııalyq tólemder nysanaly sıpatta bolady.
- Osyǵan baılanysty ekologııalyq aıyppuldardan túsetin túsimderdi aýyldyq okrýgterdiń bıýdjetterine berý usynylady. Tıisti túzetýler Parlament Májilisinde qaralyp jatqan zań jobasyna engizildi, - dedi ol.
Premer-mınıstr «qaı jerde jumys isteseń – sol jerde salyq tóle» qaǵıdatyn iske asyrý bóliginde qoldanystaǵy salyq zańnamasynda zańdy tulǵalarǵa ornalasqan jeri boıynsha qurylymdyq bólimsheler arqyly salyq tóleý quqyǵy berilgenin atap ótedi.
- Sonymen birge ózge aýmaqta salyq salý obektileri bolǵan kezde qurylymdyq bólimshelerdi mindetti túrde tirkeý zańnamamen bekitilse, bızneske qosymsha ákimshilik jáne qarjylyq salmaq salady jáne júrgizilip jatqan retteýshilik qysymdy azaıtý saıasatyna sáıkes kelmeıdi,- dedi Oljas Bektenov.
Buǵan deıin aýyldyq okrýgterdiń bıýdjetine jekelegen salyq túsimderin berý máselesi pysyqtalyp jatqanyn jazǵan edik.