Ekologııaǵa úles: Gvardeısk garnızonynda 500 túp aǵash egiledi
ASTANA. KAZINFORM — Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov áskerı qalashyqtaǵy armııa generaly Saǵadat Nurmaǵambetov atyndaǵy alleıada ótken aǵash aǵash egý aktsııasyna qatysty. Jalpy mamyr aıynyń sońyna deıin garnızonda 500 túp aǵash egý josparlanyp otyr.
— Kógaldandyrý — tek aýmaqty abattandyrý ǵana emes. Bul — adamdardyń densaýlyǵyna jáne ekologııalyq qaýipsizdikke qosylǵan úles. Áskerı qyzmetshiler men mektep oqýshylarynyń birlesken aktsııalary jas urpaqtyń jaýapkershilik sezimin nyǵaıtyp, belsendi azamattyq ustanymyn qalyptastyrady, — dep atap ótti general-maıor Asqar Mustabekov.
Qorǵanys mınıstriniń orynbasary jumys sapary barysynda garnızondaǵy áleýmettik nysandardyń jaǵdaıymen de tanysty. Ol mektep, balabaqsha, gospıtal, garnızondyq kitaphana jáne Ulttyq áskerı-patrıottyq ortalyqtyń fılıalyn aralady.
Balalardyń bilim alýy men tárbıesine erekshe kóńil bólindi. Baýyrjan Momyshuly atyndaǵy № 43 orta mektepte jáne mektepke deıingi mekemelerde general-maıor Asqar Mustabekov materıaldyq-tehnıkalyq bazanyń jaǵdaıyn, tamaqtandyrý men jylýmen qamtamasyz etýdi, sondaı-aq kadrlarmen qamtylýyn baǵalady. Áskerı qalashyqta jalpy syıymdylyǵy shamamen 500 oryn bolatyn úsh balabaqsha jumys isteıdi.
— Balalardyń boıynda jas kúninen bastap jaýapkershilik sezimin, áskerı qyzmetke degen qurmet pen Otan qorǵaýǵa ázirlikti qalyptastyrý mańyzdy. Bul baǵytta alǵashqy áskerı daıyndyq sabaqtarynyń jáne «Jas sarbaz» áskerı-patrıottyq qozǵalysynyń áleýetin barynsha tıimdi paıdalaný qajet, — dep atap ótti ol.
Sapar qorytyndysy boıynsha Qorǵanys mınıstriniń orynbasary áleýmettik ınfraqurylymdy odan ári damytý, áskerı qyzmetshiler men olardyń otbasy músheleri úshin qolaıly jaǵdaı jasaý jóninde tapsyrmalar berdi.
Al bıyl Astanada 1 mıllıon jasyl jelek otyrǵyzylmaq.