Ekologııaǵa qatysty iri óndiristerge talaptar qoıylady – zań jobasy

ASTANA. KAZINFORM — Búgin Parlament Májilisinde «Qazaqstan Respýblıkasynyń keıbir zańnamalyq aktilerine ekologııalyq máseleler boıynsha ózgerister men tolyqtyrýlar engizý týraly» zań jobasy tanystyryldy.

Jalpy, ekologııa salasyn tsıfrlandyrýǵa erekshe mán berilip otyr.

- Qujat aıasynda kómirtegine qatysty otandyq bırjany qalyptastyrý eskerilgen. Ekinshiden, kómirteginiń áserin azaıtý úshin kógaldandyrý, aǵash otyrǵyzý máselesin sheshý qarastyrylǵan, - dedi Májilis depýtaty Erbolat Satybaldın tilshiler suraǵyna jaýap bere otyryp.

Onyń aıtýynsha, zań jobasy boıynsha «Qazgıdrometke» baılanysty usynystar qamtylǵan.

- «Qazgıdromet» 100 paıyz memlekettiń qaramaǵynda. Sondyqtan bıýdjetke túsetin salmaqty azaıtý úshin, ıaǵnı atalǵan mekemeniń ǵylymǵa qatysty baǵytyn básekelestik ortaǵa berý usynyldy. Bul norma osy zań jobasynda talqylanady, - dedi depýtat.

Munymen qosa ol munaı ári gaz tasymaldaıtyn qubyrlardyń sanattaryn ózgertý qarastyrylǵanyn aıtty. Bul rette II sanattan I sanatqa aýystyrý qajet. Sanatty anyqtaý jónindegi nusqaýlyqqa sáıkes, lastaýshy zattardyń shyǵaryndylary jylyna 1000 tonnadan artyq bolǵan jaǵdaıda – nysan I sanatqa jatady.

Erbolat Satybaldınniń sózine qaraǵanda, aýany kóp lastaıtyn iri óndiristerge de talaptar qoıylady.

- Monıtorıngileýdiń avtomattandyrylǵan júıesi naqty shyǵaryndylardyń aýmaǵyn kórsete alady. Bul turǵyda ishki naryqty retteý aıasynda bırjany quramyz. Sol kezde olar aldyn ala ózderiniń shyǵaryndylaryna tıisti somada aqsha tóleıdi. Avtomattandyrylǵan júıe osy kólemdi anyqtap turady. Eger bul qaldyqtar tıisti belgilengen kólemnen kóbirek bolsa, onda aıyppul tóleıdi. Osy oraıda qomaqty tólem qarastyrylǵan, - dedi depýtat.

Eske sala keteıik, 2021 jyly Memleket basshysy Qasym-Jomart Toqaev Qazaqstan men Reseıdiń XVII óńiraralyq yntymaqtastyq forýmynda Qazaqstannyń 2060 jylǵa qaraı kómirtegi beıtaraptyǵyna qol jetkizetinin málim etken edi. 

Byltyr jeltoqsan aıynda elimizde kómirtegi beıtaraptyǵyna qol jetkizýdiń jol kartasy ázirlenip jatqany aıtyldy.