Ekologııa zańnamasyn saqtamaǵan Ekibastuzdaǵy iri kompanııaǵa 33 mlrd teńge aıyppul salyndy

NUR-SULTAN. QazAqparat – Ekibastuz GRES-1 kompanııasyna 33 mlrd teńgeden astam aıyppul salyndy. Bul týraly QazAqparat Ekologııa mınıstrligine silteme jasap habarlaıdy.

«Pavlodar oblysynyń Ekologııa departamenti Bolat Nurjanov atyndaǵy Ekibastuz GRES-1 JShS-ǵa qatysty birinshi jartyjyldyq josparly tekserý júrgizdi. Tekserý barysynda 2018-2020 jyldarǵa arnalǵan parnıktik gazdar shyǵaryndylaryna kvotalar bólýdiń ulttyq josparyndaǵy belgilengen ruqsat etilgen kvotalar kóleminen asyp ketý bóliginde ekologııalyq zańnamany buzýshylyq anyqtaldy. Parnıktik gazdar shyǵaryndylaryna kvotalar saýdasynyń qoldanystaǵy júıesi sheńberinde kásiporynmen ótelmegen kvota kólemi 2 mln tonnadan astam SO2 qurady. Zańnama talaptaryna sáıkes kásiporyn ekologııalyq zańnamada belgilengen merzimde naryqta kvotalar satyp alý arqyly jetispeıtin kvotalar kólemin jabýǵa májbúr bolǵan», -delingen habarlamada.

Osy jaıtqa qatysty quqyq buzýshylyq týraly hattama toltyrylyp, aıppul salyndy. Aıyppul somasy 33 301 625 myń teńgeni quraıdy.