Ekologııa zańnamasyn buzatyn iri kásiporyndarǵa qatysty jaza kúsheıtiledi
«Ákimshilik jaýapkershilikke tartý úshin belgilengen eskirý merzimin ulǵaıtý jóninde túzetýler usynyldy. Atap aıtsaq, jeke tulǵalarǵa qatysty merzimdi 2 aıdan 1 jylǵa deıin, al zańdy tulǵalarǵa - 1 jyldan 3 jylǵa deıin ulǵaıtý kózdelgen. Negizi profılaktıkalyq tekserýler jylyna bir retten kóp ótkizilmeıdi. Sonyn saldarynan, tekseris kezinde bir nemese odan kóp jyl buryn jasalǵan zań buzýshylyqtary anyqtalǵan kásiporyndar tıisti jazadan qutylyp ketip jatady. Taǵy bir aıtatyny, tájirıbe kórsetip otyrǵandaı, keıbir iri kásiporyndar júıeli túrde jyl saıyn bir zań buzyshýlyqqa birneshe ret jol beredi. Osyǵan oraı, zań jobasynda 3 jyldyń ishinde ekologııalyq zańnamany júıeli buzatyn iri kásiporyndarǵa qatysty neǵurlym qatań jaza qoldaný qarastyrylǵan», - dedi mınıstr.
Onyń aıtýynsha, atalǵan norma qazir de bar, biraq eskirý merzimi bir jyl bolǵandyqtan retsıdıv ınstıtýty iske aspaıdy. Bul óz kezeginde iri kásiporyndy júıeli zań buzýshylyqtar jasamaýǵa yntalandyrmaıdy. Osyǵan baılanysty, merzim 3 jylǵa deıin uzartyldy.
«Qorshaǵan ortany qorǵaý salasyndaǵy ákimshilik quqyqbuzýshylyq úshin belgilenetin aıyppuldardy ulǵaıtýǵa basty sebepshi bolǵan jaıt - tabıǵat paıdalanýshylardyń qorshaǵan ortanyń lastanýyna jol bermeý boıynsha sharalardy tolyqqandy oryndamaýy jáne qajetti modernızatsııany júzege asyrmaýy. Negizi qazirgi ákimshilik aıyppuldar yntalandyrý tetigi bola almaı tur. Bir sózben aıtsaq, tabıǵat paıdalanýshylary úshin quqyqbuzýshylyq pen jibergen olqylyqtardy joıýdyn ornyna aıyppul tóleý áldeqaıda tıimdirek.
Sol sebepti ekologııalyq zań buzýshylyqtar úshin sanktsııalardy qatańdatý kózdeledi. Mysaly, qorshaǵan ortaǵa normatıvten tys jáne ruqsatsyz emıssııalar úshin ákimshilik sanktsııalardyń mólsheri 10 ese, al qalǵan quqyq buzýshylyqtar boıynsha orta eseppen 2 ese ulǵaıady», - dedi Myrzaǵalıev.
