Ekologııa vıtse-mınıstri shardaralyq sharýalardyń máselelerin tyńdady
TÚRKІSTAN. QazAqparat - Túrkistan oblysy Shardara aýdanyna Qazaqstan Respýblıkasynyń Ekologııa, geologııa jáne tabıǵı resýrstar vıtse-mınıstri Serik Qojanııazov issaparmen keldi, dep habarlaıdy QazAqparat tilshisi.
Vıtse-mınıstr Kóksý aýylynda bolyp, sharýalarmen jáne dıqandarmen, aýdan depýtattarymen kezdesti.
Onda turǵyndar tarapynan aǵyn sýdy ýaqytyly berý, Qyzylqum magıstraldy kanalyn qaıta jóndeýden ótkizý, aǵyn sý tólemaqysyn tómendetý jáne lımıtin retteý sekildi máseleler kóterildi.
Kezdesýge qatysqan QR Parlamenti Májilisiniń depýtaty Q.Erjan tabıǵı qubylysqa baılanysty aǵyn sý tapshylyǵyna tap bolatyn sharýalarǵa qosymsha kúnkóris jaǵdaıyn jasaý, aǵyn sý tólemaqysyn durys júıeleý kerektigin aıtty. Sonymen qatar, dıqandar ár jyl saıyn jergilikti ákimdikpen aqyldasyp, jyldyq jaǵdaılardy baǵamdaı otyryp suranysqa ıe ónimderdi egýmen aınalysýǵa kóshý kerektigin qozǵady.
Jergilikti sharýa qojalyq basshylary jáne dıqandardyń máselelerin tyńdaǵan Serik Qojanııazov kópshilik tarapynan qoıylǵan suraqtarǵa jaýap berdi.
Kezdesý barysynda aǵyn sýǵa baılanysty qosymsha usynystar aıtyldy. Taraptar búgingi kúngi eginge qajetti sýdy jetkilikti mólsherde bosatýǵa kelisti. S.Qojanııazov aýdandaǵy aǵyn sý tarıfyn retteýdi mınıstrlikte kóterip, tıimdi sheshim shyǵaratynyn aıtty.
