Ekologııa vıtse-mınıstri ózen alqaptarynda qurylys salmaý kerektigin eskertti

NUR-SULTAN. QazAqparat - QR Ekologııa, geologııa jáne tabıǵı resýrstar vıtse-mınıstri Sergeı Gromov elimizde ózen alqaptarynda qurylys salý problemasyn kóterdi, dep habarlaıdy QazAqparat tilshisi.

«Menińshe, jergilikti atqarýshy organdar ózen alqaptarynda qurylys salýmen tyǵyz jumys isteýi qajet. Ókinishke qaraı, ol jerlerde saıajaılar, tipti turǵyn úıler men saýda alańdary salynǵan», - dedi ol Ortalyq kommýnıkatsııalar qyzmetindegi brıfıngte.

Osy rette vıtse-mınıstr naqty mysalǵa Aqtóbe oblysynda oryn alǵan jaǵdaıdy keltirdi.

«Aıtalyq, Aqtóbe oblysynda ózen arnasyn tazalaýdy bastap edik, ekologııany búldirip jatyr degen shaǵymdar bastalyp ketti. Negizinde turǵyn úı de, saıajaı da durys jerge salynbaǵan. Sondyqtan sý basyp keledi. Tabıǵatty aldaı almaısyń. Ózen qaı arnamen aqsa, sol arnasyn barlyq ýaqytta da taýyp alady. Sondyqtan turǵyndarǵa ózenderdiń alqabynda jáne qurylysqa tyıym salynǵan jerlerge úı salmaý qajettigin eskertemin. Sonda eshqandaı másele de týyndamaıdy jáne halyqtyń qaýipsizdigi de qamtamasyz etiledi», - dedi Sergeı Gromov.