2026 jyly Qazaqstanda 9 energoblok, 55 qazandyq jáne 51 týrbına jańartylady
ASTANA. KAZINFORM – Energetıka mınıstrligi eldegi energetıkalyq ınfraqurylymdy jańǵyrtý boıynsha júıeli jumysty jalǵastyryp jatyr. Memleket basshysynyń tapsyrmasyna sáıkes, 2026 jyly aýqymdy jóndeý naýqandary men energetıka salasyn jańǵyrtýǵa arnalǵan Ulttyq joba iske asyrylady.
Mınıstrlik málimetinshe, atalǵan sharalar barlyq óńirde jylý jáne elektrmen jabdyqtaýdyń senimdiligin arttyrýǵa baǵyttalǵan. Josparlanǵan jumystar energııa nysandarynyń tehnıkalyq áleýetin jaqsartyp, tutynýshylardy turaqty jylý jáne elektr energııasymen qamtamasyz etýge múmkindik beredi.
- 2026 jyly elimizde 9 energoblok, 55 qazandyq jáne 51 týrbına jóndeýden ótedi. Sonyń nátıjesinde jylý elektr ortalyqtarynyń tozý deńgeıi 61 paıyzdan 59 paıyzǵa deıin tómendeıdi. Jóndeý jumystaryn josparly ári keshendi júrgizý stansalardyń senimdi jumysyn qamtamasyz etip, olardy joǵary qaýip aımaǵynan («qyzyl aımaq») kezeń-kezeńimen shyǵarýǵa jaǵdaı jasaıdy, - delingen aqparatta.
Aıta keteıik, energetıka salasyn jańǵyrtýǵa arnalǵan Ulttyq joba ekinshi jyl qatarynan júzege asyrylyp otyr. Baǵdarlama bes jylǵa josparlanǵan jáne ınjenerlik ınfraqurylymdy aýqymdy jańartýdy kózdeıdi.
Joba aıasynda bes jyl ishinde elimizde 1,6 myń shaqyrym jylý jelisi men 78 myń shaqyrym elektr jelisi jańartylady. Nátıjesinde 2029 jylǵa qaraı jylý jelileriniń tozý deńgeıin 52 paıyzdan 42 paıyzǵa, al elektr jelileriniń eskirýin 74 paıyzdan 45 paıyzǵa deıin tómendetý josparlanyp otyr.
Jańǵyrtý jumystary ekonomıkanyń jáne halyqtyń ósip kele jatqan qajettiligin úzdiksiz qamtamasyz ete alatyn ornyqty otyn-energetıka keshenin qalyptastyrýǵa baǵyttalǵan.
Eske salaıyq, qatty aıazǵa baılanysty Petropavl JEO-2 kúsheıtilgen rejımde jumys istep turǵany habarlandy.