Ekologııa salasyndaǵy aıyppuldardyń basym bóligi munaı, gaz salasyndaǵy kásiporyndardyń enshisinde - Qorshaǵan ortany qorǵaý mınıstrligi
ANA. 24 maýsym. QazAqparat /Aıdar Ospanalıev/ - Ekologııa salasyndaǵy aıyppuldardyń basym bóligi munaı, gaz salasyndaǵy kásiporyndardyń enshisinde.
Bul týraly búgin Qorshaǵan ortany qorǵaý mınıstrliginiń keńeıtilgen alqa májilisinde atalmysh mınıstrliktiń Ekologııalyq retteý men baqylaý komıtetiniń tóraǵasy Saǵymbek Mutashev málim etti.
Onyń sózine qaraǵanda, kómirsýtegi shıkizatyn qaıta óńdeý nysandarynda tehnologııalyq jabdyqtardyń isten shyǵýyna jıi jol beriledi. Bunyń nátıjesi alaýda ruqsat etilmegen gazdyń jaǵylýyna ákelip soǵyp otyr. «Birlesken tekserýler kezinde 2010 jyly «Teńizshevroıl» jaýapkershiligi shekteýli seriktestiginiń gazdy qaıta óńdeý zaýytynda tehnologııalyq jabdyqtardyń jumysyna qatysty 60 shtattan tys jaǵdaı tirkelgen. Olar jumysty toqtatyp, ilespe gazdy alaý arqyly jaǵýǵa májbúrledi. Nátıjesinde atmosferaǵa 420 tonna zııandy zattar shyǵaryldy. Osy quqyq buzý áreketteri úshin «Teńizshevroıl» jaýapkershiligi shekteýli seriktestigine jalpy somasy 476,5 mıllıon teńge ákimshilik aıyppul salynyp, onyń 441,7 mıllıon teńgesi tólendi. Sondaı-aq jalpy somasy 3 mıllıard 600 mıllıon teńge bolatyn zalaldy óteý jóninde talap qoıylyp, ol soma memleket kirisine berildi»,-dedi komıtet tóraǵasy.
Tehnologııalyq jabdyqtardyń isten shyǵýy eldegi basqa da kásiporyndardan baıqalǵan. Osyndaı jaǵdaı 2011 jyldyń qańtarynda «Qarashyǵanaq Petroleým Opereıtıng» kompanııasynda oryn aldy. «Onda ruqsat etilmegen gazdy jaǵý nátıjesinde qaldyqtardy normatıvten tys ornalastyrý jaǵdaıy men lastaýshy qaldyqtar anyqtaldy. Osyǵan qaraı 2 mıllıard teńgege aıyppul salyndy, biraq kompanııa bul aqshany osy ýaqytqa deıin tólegen joq», -dedi S.Mutashev.
