​​Ekologııa mınıstrliginiń memlekettik qyzmetteri tolyq elektrondy formatqa kóshirildi

NUR-SULTAN. QazAqparat - QR Ekologııa, geologııa jáne tabıǵı resýrstar mınıstrligi memlekettik qyzmetterin 100%-ǵa elektrondy formatqa kóshirýdi qamtamasyz etti. Memlekettik qyzmetterdiń jańartylǵan reestrine sáıkes, Mınıstrlikke 42 qyzmet bekitilgen. Onyń bári avtomattandyryldy, dep habarlaıdy QazAqparat vedomstvonyń baspasóz qyzmetine silteme jasap.

«Salystyrmaly túrde aıtsaq, byltyr bul kórsetkish 87,23% bolsa, 2020 jyldyń basynda 90,7%-dy qurady. Ótken jyly memlekettik qyzmetterdi elektrondy formatqa kóshirýdiń 2019 jylǵa arnalǵan josparyna sáıkes 10 qyzmet, 2020 jyldyń alǵashqy jartysynda 2 qyzmet avtomattandyryldy.

Atap óteıik, memlekettik qyzmetterdi elektrondy formatqa kóshirý protsestiń tyńǵylyqty tehnıkalyq daıyndyǵynyń arqasynda júzege asty. Osylaısha, qazir Mınıstrlikte barlyq memlekettik qyzmetti elektrondy formatta alýǵa bolady», delingen habarlamada.
Aıta keteıik, mınıstrlik qyzmetterdi avtomattandyryp qana qoımaı, olardyń bárin tek elektrondy formada usynýǵa umtylady. Eger 2019 jyly 28 qyzmet elektrondy formada ǵana kórsetilse, qazir qyzmetterdiń 88%-y (37 qyzmet) elektrondy formada, ıaǵnı qaǵaz túrindegi balamasyz usynylady.
Endi mınıstrlik memlekettik qyzmetterdi damytý úshin bıznes-protsessterdi ońtaılandyrý jáne bıometrıkalyq aýtentıfıkatsııa tehnologııasyn engizýdi qolǵa alady.