Ekologııa mınıstrligi sý resýrstaryn basqarýdaǵy ózekti máselelerdi atady

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi Sý resýrstary komıtetiniń tóraǵa orynbasary Dosbol Bekmaǵambetov sý resýrstaryn basqarýdaǵy ózekti máselelerdi atady, dep habarlaıdy QazAqparat tilshisi.

«Klımattyq faktorlardan basqa, birqatar jaǵdaılar sý resýrstaryn basqarý jáne sýǵa degen suranys máselelerine teris áser etedi. Eń aldymen, eldiń ońtústik jáne batys aımaqtarynyń kórshiles elderdiń sý saıasatyna úlken táýeldiligi. Bul óńirlerde el halqynyń jartysynan kóbi turady jáne olardyń ómir súrý jaǵdaılary sýmen qamtamasyz etýge tikeleı baılanysty», - dedi D. Bekmaǵambetov Ortalyq kommýnıkatsııalar qyzmetinde ótken baspasóz máslıhatynda.

Ekinshiden, spıkerdiń aıtýynsha, sý ekojúıeleriniń qajettilikteri «qaldyq prıntsıpi» boıynsha sońǵy orynda qalady. Bul – Aral men Balqash problemalarynyń basty sebebi.

Úshinshiden, sýdy paıdalaný tıimdiliginiń tómen bolýy jáne sý berý qyzmetterine tómen tarıfter de asa ózekti.

«Tórtinshiden, sý resýrstary komıteti qazirgi shtat sany jaǵdaıynda sý qoryn utymdy paıdalaný men qorǵaýǵa tolyqqandy baqylaýdy qamtamasyz ete almaıdy. Sý salasyn taldaý men perspektıvalyq damytý tıisti nazarsyz qalyp otyr. Sý resýrstaryn basqarý kezinde qabyldanatyn sheshimderdi ǵylymı turǵydan qoldaýdyń azdyǵy jáne bilikti kadrlardyń jetispeýshiligi taǵy bar», - dedi komıtet ókili.

Buǵan deıin Dosbol Bekmaǵambetov Qazaqstanda 2030 jylǵa qaraı sý resýrstarynyń tapshylyǵy 23,2 tekshe kılometrge jetýi múmkin ekenin aıtqan edi.

Foto: ortcom.kz