Ekologııa mınıstrligi sý resýrstaryn basqarýdaǵy negizgi problemalardy atady

NUR-SULTAN. QazAqparat – Ǵylym sý resýrstaryn basqarý júıesinen syrtta qaldy. Bul týraly Sý resýrstary komıteti sý qoryn paıdalaný jáne qorǵaý salasyndaǵy memlekettik baqylaý basqarmasynyń basshysy Marat Imanalıev aıtty, dep habarlaıdy QazAqparat tilshisi.

M. Imanalıev jańa Sý kodeksinde birqatar negizgi problemalardy sheshý joldary usynylatynyn aıtty.

«Eń aldymen, sý resýrstaryn basqarý qyzmetin memlekettik-aqparattyq qamtamasyz etýdiń jetkiliksizdigi bar. Buryn júrgizilgen qaıta qurýlarǵa baılanysty sý resýrstaryn esepke alý, taldaý, jaǵdaıdyń damýyn boljaý, sýdy paıdalanýdy baqylaý sııaqty máseleler basqarý júıesinen shyǵyp, nazarsyz qalǵan. Osylaısha naqty esepke alý men taldaýdyń bolmaýy ekonomıka salalarynyń, halyqtyń qajettilikterine jáne sý resýrstarynyń tapshylyǵyna sýdy tutynýdyń durys balansyn qurýǵa múmkindik bermeıdi», - dedi Marat Imanalıev Sý kodeksi jobasyn qoǵamdyq talqylaýda.

Spıkerdiń aıtýynsha, bul máseleni zańnamalyq turǵyda memlekettik organdardyń sý resýrstaryn esepke alý jáne monıtorıngileý quzyretin naqty aıqyndaý jolymen, onyń ishinde aqparattyq júıelerdi paıdalaný arqyly sheshý usynylady.

Odan bólek, mınıstrlik ókili sý resýrstaryn basqarý júıesinde ǵylymı bloktyń joq ekenin aıtty.

«Ǵylym tolyǵymen derlik sý resýrstaryn basqarý júıesinen syrtta qaldy. Ozyq tehnologııalar men ınnovatsııalyq ıdeıalarǵa negizdelgen zamanaýı ǵylymnyń jetistikterin qoldanbaı, sý sektoryn damytý múmkin emes», - dedi M. Imanálıev.

Jańa Sý kodeksinde ǵylymı-zertteý ortalyǵynyń ókilettikteri men onyń sý resýrstary men sýǵa suranysty josparlaýdaǵy, basqarýdaǵy róli jáne basqa da ǵylymı mekemelerdiń qyzmetin úılestirý kózdelmek.

Sondaı-aq ilespe zań jobasynda sý sharýashylyǵy men sý resýrstary salasyndaǵy jobalardy jer qoınaýyn paıdalanýshylar paıdaly qazbalardy óndirýge arnalǵan shyǵyndardyń 1%-yn ǵylymdy damytýǵa baǵyttaý mindettemesi esebinen qarjylandyrýy múmkin jobalar tizbesine engizý usynylady.

«Budan basqa, Bilim týraly zańǵa memlekettik grant ıegerleri úshin aýyldyq kvota boıynsha mindetti 3 jyldyq jumys isteýge qatysty túzetýler, al AÓK týraly zańǵa – aýyldyq jerde jumys isteýge baılanysty jeńildikter men qoldaý alýǵa quqyǵy bar adamdardyń tizbesine sý sharýashylyǵy mamandaryn engizýge arnalǵan normalar engiziledi», - dedi Marat Imanálıev.

Foto: grander.com