Ekologııa mınıstrligi «Semeı ormanynda» órttiń jıi shyǵý sebebin atady

ASTANA. QazAqparat – Ekologııa jáne tabıǵı resrýstar mınıstrligi «Semeı ormany» rezervaty fılıalyna aǵash urlaǵany jáne jemqorlyqqa barǵany úshin jazaǵa tartylǵan adamdardyń laýazymdy qyzmetke taǵaıyndalatyndyǵy týraly aqparatqa pikir bildirdi, dep habarlaıdy QazAqparat tilshisi.

«Basshylar men mamandardy taǵaıyndaý Premer-Mınıstrdiń orynbasary – Aýyl sharýashylyǵy mınıstriniń 2017 jylǵy 14 naýryzdaǵy №120 buıryǵymen bekitilgen Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tabıǵatty qorǵaý uıymdary basshylary men mamandary laýazymynyń úlgilik biliktilik sıpattamasy talaptaryna sáıkes júrgiziledi», - dep atap ótedi mınıstrlik agenttiktiń resmı saýalyna bergen jaýabynda.

Vedomstvonyń atap ótýinshe, atalǵan buıryqta kózdelgen talaptarǵa saı kelmeıtin mamandardyń basshylyq qyzmetke taǵaıyndalǵany týraly faktiler anyqtalǵan jaǵdaıda mınıstrlik óziniń quzireti aıasynda taǵaıyndaýdyń zańdylyǵyn qarastyrady.

«Qasaqana ot qoıýǵa qatysty aıtar bolsaq, statıstıkaǵa sáıkes, Ertis mańynyń (Abaı men Pavlodar oblystary) taspa shoqqaraǵaılarynda jyl saıyn oryn alatyn órttiń 80-95 paıyzy jaı túsý saldarynan bolady. Klımattyq jaǵdaıǵa (aýa temperatýrasy, jel jyldamdyǵy), orman órtin sóndirý stansasynyń qoljetimdiligi men shalǵaılyǵyna baılanysty memlekettik oran kúzetinde kóp jaǵdaıda órt 0,01-den 3 gektarǵa deıin alqapta oqshaýlanady. Óńirde qasaqana ot qoıý tirkelgen joq», - dep sendiredi Ekologııa mınıstrligi.