Ekologııa mınıstrligi «Ósimdik álemi týraly» zań jobasyn daıyndap jatyr

NUR-SULTAN. QazAqparat - Qazaqstannyń orman sharýashylyǵyn damytyp, janýarlar dúnıesin baıytýda qandaı máseleler bar? Bul suraqqa Ekologııa, geologııa jáne tabıǵı resýrstar mınıstri Maǵzum Myrzaǵalıev jaýap berdi, dep habarlaıdy QazAqparat tilshisi.

«Elde ormandardy molyqtyrý kóleminiń artýy baıqalady - 2018 jyly 52,7 myń gektardy qurasa, ótken jyly 64 myń gektarǵa jetti. 4,6 myń gektar alańda elordanyń jasyl aımaǵyn qurý boıynsha jumystar júrgizilgen bolatyn. Atyraý, Kókshetaý, Qaraǵandy, Aqtóbe, Qyzylorda, Túrkistannyń, oblys ortalyqtarynyń aınalasynda uqsas aımaqtar qurýdy josparlaýdamyz. Qazirdiń ózinde jumys jobalary ázirlendi. 2030 jylǵa qaraı jasyl aımaqtardyń alańyn 68,0 myń gektarǵa jetkizý josparlanýda», - dedi Maǵzum Myrzaǵalıev búgin Ortalyq kommýnıkatsııalar qyzmetinde ótken halyqqa onlaın esep berý barysynda.

Mınıstr sonymen qatar orman órtteriniń aldyn alý jumystary jalǵasyp jatqanyn aıtady. Alaıda, qabyldanǵan sharalarǵa qaramastan, jyl basynan beri 16 myń gektardan astam aýmaqta 191 orman órti tirkelgen. Kelgen shyǵyn 1,8 mlrd teńgeni qurady.

«Orman alqaptarynyń jaǵdaıyna qoǵamdyq baqylaý júrgizýge el turǵyndaryn barynsha tartý úshin arnaıy veb-saıt iske qosyldy. Sekseýil ekpelerin saqtaý da biz úshin mańyzdy suraq. 2019 jyly Aral teńiziniń qurǵaǵan túbinde Koreı orman qyzmetimen ózara is-qımyl jasaý aıasynda 5 myń gektarǵa egildi. Osy jyly 2,5 myń gektarǵa otyrǵyzylady. Sondaı-aq 2019 jyly Almaty, Jambyl, Qyzylorda jáne Túrkistan oblystarynda 165,6 myń sekseýil ekpeleri jáne 23,5 myń gektar sekseýil tuqymy otyrǵyzyldy. Tutastaı alǵanda, bıyl «Ósimdik álemi týraly» zań jobasyn jáne 2030 jylǵa deıingi Qazaqstannyń bıologııalyq ártúrliligin saqtaý tujyrymdamasyn daıyndaımyz», - dedi ol.