Ekologııa mınıstrligi men ІІM brakonerlikpen kúreste kúsh biriktirmek

NUR-SULTAN. QazAqparat – QR Ekologııa jáne QR Іshki ister mınıstrlikteri brakonerlermen kúresý úshin kúsh biriktirmek, dep habarlaıdy QazAqparat QR Ekologııa mınıstrliginiń Telegram kanalyna silteme jasap.

«Balqash-Alakól basseıniniń sý aıdyndarynda brakonerliktiń aldyn-alý jáne onymen kúresý maqsatynda, ekologııa, geologııa jáne tabıǵı resýrstar men ishki ister mınıstrleriniń arasynda Balqash-Alakól basseıniniń sý aıdyndarynda brakonerlikpen kúres boıynsha operatıvtik-profılaktıkalyq is-sharalar júrgizý boıynsha qabyldanǵan jospar jáne birlesken buıryqqa qol qoıyldy»,-delingen habarlamada.

Atalǵan qujattardy iske asyrý maqsatynda, atalǵan mınıstrlikterdiń ortalyq apparatynyń jáne qurylymdyq bólimderiniń tájirıbeli qyzmetkerlerinen jumys toby quryldy.

Sonymen qatar, Qapshaǵaı qalasynda Jumys tobynyń alǵashqy otyrysy ótip, onda qurylǵan birlesken mobıldik toptar jumysynyń negizgi baǵyttary belgilendi.

Alǵashqy otyrys respýblıkalyq jáne oblystyq mańyzy bar buqaralyq aqparat quraldary ókilderiniń qatysýymen ótti.

Odan basqa, atalǵan is-sharanyń bastalýyn tanymal áleýmettik jelilerde keńinen jarııalaý maqsatynda, májiliske Almaty oblysy boıynsha jemqorlyqqa qarsy «Adaldyq alańy» ortalyǵynyń, «Master lodok» eriktiler toby, Almaty oblysy boıynsha «Balyq sharýashylyqtary qaýymdastyǵy-BD» respýblıkalyq qaýymdastyǵy, QR áýesqoılyq-sporttyq balyq aýlaý federatsııasynyń basshylary jáne «Ohotnıkı KZ» saıty ákimshiliginiń ókilderi qatysty.

Júrgizilgen jumystar barysy jáne nátıjeleri týraly aqparat buqaralyq aqparat quraldary men ınternet-resýrstary arqyly jarııalanyp turady.