Ekologııa mınıstrligi Kishi Taldykól taǵdyryna qatysty: Qosymsha zertteý júrgizý qajet

NUR-SULTAN. QazAqparat – Búginde elorda irgesindegi Kishi Taldykól taǵdyry qoǵamda keńinen talqyǵa túsip jatyr. Eko-belsendiler men janashyrlar kóldi saqtap qalýdy surap otyr. Osy oraıda atalǵan kóldiń odan ári taǵdyry ne bolady? Kópshilikti mazalaǵan máselege qatysty QR Ekologııa, geologııa jáne tabıǵı resýrstar mınıstrligi resmı túsinikteme berdi, dep habarlaıdy QazAqparat tilshisi.

«Taldykól - sý obektisi. Elorda ákimdigi óz quzyreti aıasynda atalǵan sý qoryn eldi mekendik jer sanatyna aýystyrý týraly qaýly shyǵardy. Sý qory jerlerin basqa sanatqa aýystyrý ol tabıǵı jáne jasandy túrde joıylǵan jaǵdaıda, sondaı-aq ondaǵy sý kólemi azaıǵan kezde aýystyrylady. Osy oraıda Kishi Taldykóldiń qansha bóligi tabıǵı sebeppen joǵaldy jáne mańynda júrip jatqan qurylys saldarynan kóldiń kólemi qanshalyqty kishireıgenin zertteý qajet», - dep túsindirdi atalǵan vedomostvodan.

Mınıstrliktiń resmı habaryna súıensek, aldymen kólge qatysty qosymsha zertteýler júrgizip, onyń nátıjesine qaraı túpkilikti sheshim qabyldaý qajet.

«Mınıstrliktiń ustanymy - Kishi Taldykól sý obektisi retinde qaldyrylsyn. Osy rette kólge qaladan keletin jaýyn-shashyn jáne túrli sý qaldyǵy aǵynynyń azaıǵany baıqalady. Kóldi qosymsha sýmen toltyryp, onyń tirshiligin qaıta jandandyrýǵa qatysty sharalar qabyldaý qajet», - delingen habarlamada.

Eske sala ketsek, jaqynda elorda ákimdigi atalǵan kóldiń taǵdyryna qatysty óz ustanymyn alǵa tartty.

Sondaı-aq, jýyrda Kishi Taldykólge bir top qoqıqaz ushyp keldi. Osyǵan baılanysty atalǵan meken az ýaqyttyń ishinde elorda turǵyndary men qala qonaqtarynyń týrıstik jáne demalys ornyna aınalyp úlgerdi.