Ekologııa mınıstrligi Kaspıı jaǵalaýynan tabylǵan ıtbalyqtyń óleksesine qatysty túsinik berdi
Aıta keteıik, Aqtaý qalasynda Kaspıı teńizi jaǵalaýynan tabylǵan óli ıtbalyq týraly aqparat 18 shilde kúni Instagram-da paıda boldy.
«Itbalyq tabylǵan jerge jedel túrde basqarma basshysy A. Shıhmetov bastaǵan Jaıyq-Kaspıı oblysaralyq basseındik balyq sharýashylyǵy ınspektsııasynyń Mańǵystaý oblysy boıynsha balyq sharýashylyǵy basqarmasynyń memlekettik ınspektorlarynan qurylǵan top jiberildi. Oqıǵa ornyna kelgen kezde ıtbalyqtyń denesi tabyldy. Quıryǵy túksiz, ydyraý kúıinde boldy. Aldyn ala aqparat boıynsha, janýar birneshe aı buryn teńizde ólgen, keıin teńiz daýylymen Aqtaý qalasy mańyndaǵy jaǵalaýǵa shyǵyp qalǵan» dep túsindirdi vedomstvo.
Janýardyń denesinde balyq aýlaý quraldarynyń izi, tunshyǵý, sondaı-aq zorlyq-zombylyq belgileri joq.
«Sol sebepti tabıǵatty qorǵaý polıtsııasy men veterınarlyq qyzmet ókilderi oqıǵa ornyna shaqyrylmady. Jelide taraǵan aqparatta ıtbalyqtyń aınalasy qan ekeni aıtylady. Biraq onyń qan emes, kún sáýlesi áserinen janýardyń denesinen aǵyp jatqan teri astyndaǵy maı ekenin habarlaımyz» dep habarlaıdy Ekologııa, geologııa jáne tabıǵı resýrstar mınıstrligi.
