Ekologııa mınıstrligi Ertis ózenindegi sý bosatýǵa baılanysty táýekelderge nazar aýdarýy kerek – depýtat Áshimbetov

ASTANA. QazAqparat – Ekologııa jáne tabıǵı resýrstar mınıstrligi Ertis ózenine qatysty sý bosatýǵa baılanysty táýekelderge basa nazar aýdarýy tıis. Óıtkeni, ózen jaıylmasyna sýdyń barýy azaısa, onyń ekologııalyq saldarymen qosa eldi mekenderge de qaýip tóndiredi. Ekologııa vedomstvo basshysy Zúlfııa Súleımenovanyń atyna joldaǵan saýalynda Parlament Májilisiniń depýtaty Nurjan Áshimbetov osy máseleni kóterdi, dep habarlaıdy QazAqparat.

Depýtattyń aıtýynsha, salaaralyq komıssııanyń sheshimine sáıkes, qazirgi kúni Ertis ózeniniń jaıylmasyna sý bosatý kezeńine qatysty daıyndyq jumystary júrgizilýde. Sonymen qatar, komıssııa 16 sáýirden bastap 22 kúnge sozylatyn sý bosatý kestesin de bekitken.

«Qazir Ýlba jáne Ýba ózenderiniń búıirlik aǵyndaryndaǵy sý kóleminiń azaıǵany baıqalady. Sonyń saldarynan 20 sáýirden bastap tórt táýlik boıy sýdy bosatý kólemi saǵatyna 500 tekshe metrge deıin sýdyń azaıyp, bosatý kóleminiń kesteden aýytqyǵany belgili bolǵan. Al Ertis basseıindik ınspektsııanyń aqparaty boıynsha 20 sáýirden bastap navıgatsııalyq kezeńniń bastalýyna oraı Buqtyrma qoımasynan sý bosatý ortasha eseppen saǵatyna 500-den 380 tekshe metrge deıin azaıǵan. Kóp jylǵy taldaý kórsetkenindeı, sý bosatýdyń bıylǵy josparlanǵan kólemi boıynsha, jaıylmanyń jalpy aýdanynyń 65-70 paıyzyna ǵana sý barady. Alaıda osy josparlanǵan sý bosatýdan aýytqýy Ertis ózeniniń jaıylmasyna sýdyń barýyn tómendetip, ol ekosıstemanyń nasharlaýyna jáne shabyndyq ónimderiniń azaıýyna ákep soǵady», - deıdi depýtat Áshimbetov.

Sonymen qatar, ol sý bosatýdy durys deńgeıde ustap turý arqyly Pavlodar oblysynyń jaıylymdaryna sýdyń barýyn qalyptandyrý máselesin alǵa tartty.

«Ekologııa jáne tabıǵı resýrstar mınıstrligi sý bosatý máselesine baılanysty táýekelderdi nazarǵa alsa eken. Óıtkeni, sarapshylardyń taldaýyna sáıkes, sý bosatýdy kúrt tómendetý Ertis ózeniniń arnasyndaǵy jaǵalaýlardyń qulaýyna ákep soǵady. Ári ózen boıyndaǵy eldi mekenderge de qaýip tóndiredi. Budan bólek, osy ólkedegi usaq zııankestermen kúreste de sý bosatý sharýasyna mańyz berý asa qajet. Bul rette zııankestermen kúres nátıjeli bolýy úshin sýdyń ózen arnasyna kirý merzimi de 15 mamyrdan keshikpeýi tıis», - deıdi ol.