Ekologııa mınıstrligi Býtakov shatqalynda aǵashtardyń kesilýine qatysty túsinik berdi
NUR-SULTAN. QazAqparat – Ekologııa, geologııa jəne tabıǵı resýrstar mınıstrliginiń baspasóz hatshysy Samal Ibraeva Almatydaǵy Býtakov shatqalynda aǵashtardyń kesilýine qatysty túsinik berdi, dep habarlaıdy QazAqparat tilshisi.
«Maǵan birneshe BAQ ókili habarlasyp, Býtakov shatqalyndaǵy aǵashtardyń kesilýne qatasty jaǵdaıdy túsindirýimdi surady. Bul taqyryp jyl boıy birneshe ret kóterilgen. Zańǵa səıkes, memlekettik ulttyq tabıǵı saıabaqtarda aǵash tek orman qorǵaý is-sharalaryn júzege asyrýǵa qajet sanıtarlyq maqsatta ǵana kesiletinin eske salǵym keledi. Ol ýəkiletti organnyń ruqsatymen memlekettik ekologııalyq saraptamanyń oń tujyrymy boıynsha júrgiziledi», - dep jazdy Samal Ibraeva Facebook-tegi paraqshasynda.
Baspasóz hatshysynyń jazýynsha, Býtakov shatqalynda memlekettik ekologııalyq saraptamanyń oń tujyrymymen Orman sharýashylyǵy jəne janýarlar dúnıesi komıteti tóraǵasynyń buıryǵy negizinde sanıtarlyq aǵash kesý jumysy júrgizilip jatyr. Atap aıtqanda, shatqaldaǵy aǵashtardy kesý shyrshaly syldyrshóp jəne diń shirigimen kúres maqsatynda qajet.
«Orman patologııasyn tekserýdi 2015 jyly «Botanıka ınstıtýty» RMM jəne «Ósimdik qorǵaý jəne karantın ınstıtýty» RMM júrgizgen bolatyn. Memlekettik ekologııalyq saraptama alý kezinde qoǵamdyq tyńdaýlar ótkizilip, ol BAQ-ta jarııalandy. Ormanshylardyń aıtýynsha, jappaı sanıtarlyq aǵash kesý zııankestermen kúreste jəne aǵash aýrýlary órshigen kezde, orman órti nemese ózge de túrli qolaısyz tabıǵat qubylystary oryn alǵan kezde búlingen toǵaıdy tazartý maqsatynda júrgiziledi. Ol orman alqabyn tazartyp, orman ósimdikterin egýge nemese onyń tabıǵı jolmen jańarýyna qolaıly jaǵdaı týǵyzýǵa baǵyttalǵan», - deıdi Samal Ibraeva.
Eske sala ketsek, jyl basynda Almatydaǵy Býtakov shatqalynda 8 gektar aýmaqtyń aǵashy kesiletini habarlanǵan bolatyn.
Foto: facebook.com/samal.ibrayeva