Ekologııa mınıstrligine qarasty 8 qyzmetker jemqorlyq boıynsha sottaldy – Antıkor

ASTANA. KAZINFORM – Sybaılas jemqorlyqqa qarsy is-qımyl agenttigi Kazinform saýalyna joldaǵan jaýapta Ekologııa jáne tabıǵı resýrstar mınıstrliginiń qyzmetkerleri arasyndaǵy sybaılas jemqorlyq kórsetkishteri týraly málimet berdi.

Eske salsaq, «Bókeıorda» memlekettik tabıǵı rezervatynyń bas dırektory jemqorlyq boıynsha kúdikke ilingeni málim bolǵan. 

Osyǵan oraı Sybaılas jemqorlyqqa qarsy is-qımyl agenttiginen Ekologııa jáne tabıǵı resýrstar mınıstrligi qyzmetkerleriniń arasyndaǵy jemqorlyq kórsetkishi týraly málimet surattyq.

- Agenttik 2024 jyly mınıstrliktiń jáne onyń aýmaqtyq bólimsheleriniń qyzmetshilerine qatysty 15 sybaılas jemqorlyq qylmysty tirkedi. Olardy jasaýda 9 adam áshkerelendi, onyń ishinde 8 adam sottaldy. Aıaqtalǵan qylmystyq ister boıynsha belgilengen zalal - 167,3 mln teńge, onyń 45 mln teńgesi óteldi, - dep jazylǵan jaýapta.

Agenttik 2024 jyly jemqorlyqtyń aldyn alý maqsatymen «Ertis Ormany» jáne «Semeı ormany» tabıǵı rezervattaryndaǵy sybaılas jemqorlyq táýekelderine syrtqy taldaý júrgizgen.

- Taldaý nátıjeleri boıynsha mınıstrlikpen birlesip, orman jáne tabıǵı resýrstardy basqarýda anyqtalǵan júıelik sybaılas jemqorlyq táýekelderin joıýǵa baǵyttalǵan Jol kartasy ázirlenip, bekitildi. Sondaı-aq, bıylǵy 21 sáýirde Agenttik alańynda ekologııa salasyndaǵy sybaılas jemqorlyq táýekelderin joıý máseleleri boıynsha vedomstvoaralyq keńes ótip, orman sharýashylyǵy men tabıǵı rezervattarda anyqtalǵan júıelik máseleler men sybaılas jemqorlyq táýekelderine erekshe nazar aýdaryldy. Nátıjesinde, mınıstrlikke jáne onyń qurylymdyq bólimshelerinde sybaılas jemqorlyq táýekelderine ishki taldaý júrgizý boıynsha usynystar berildi, - dep jazady Antıkor mamandary.