Ekologııa mınıstrligi Aqbulaq ózenindegi maıly daqtarǵa qatysty túsinik berdi
ASTANA. KAZINFORM — Ekologtar Astana turǵyndarynyń Aqbulaq ózenindegi maıǵa uqsas daqtar týraly habarlamasynan keıin tekserý júrgizdi. Mamandar sý nysanyn zerttep, alynǵan synamalardy zerthanalyq taldaýǵa jiberdi.
Astana turǵyndary Shákárim Qudaıberdiuly kóshesi mańyndaǵy Aqbulaq ózeninde maıly daqtarǵa uqsas izder paıda bolǵanyn aıtyp, alańdaýshylyq bildirdi. Qala turǵyndarynyń sózinshe, sý betinde benzın nemese ózge de tehnıkalyq suıyqtyq tógilgendeı kórinis baıqalǵan. Olar bul jaǵdaıdy rastaıtyn foto jáne vıdeolardy redaktsııaǵa joldady.
Osyǵan baılanysty Kazinform redaktsııasy QR Ekologııa jáne tabıǵı resýrstar mınıstrligine tekserý nátıjeleri men júrgizilgen zertteýler týraly aqparat berý jóninde resmı saýal joldady.
Vedomstvo málimetinshe, 28 shildede áleýmettik jelidegi Facebook jazbasynan keıin Astana boıynsha ekologııa departamentiniń mamandary Aqbulaq ózenine baryp, tekserý júrgizgen.
— Tekserý barysynda sý nysanyna vızýaldy baqylaý jasaldy. Zertteý nátıjesinde sý betiniń munaı ónimderimen lastaný belgileri, onyń ishinde benzınge tán qabyqsha, kempirqosaq tústes daqtar nemese munaı ónimderiniń bar ekenin kórsetetin ózge de belgiler anyqtalǵan joq, — dep habarlady Ekologııa mınıstrligi.
Sonymen qatar ekologııa departamentiniń zerthanalyq-analıtıkalyq baqylaý bólimi sý úlgilerin alyp, zerthanalyq taldaý júrgizgen.
— 2026 jylǵy 28 shildedegi № 35 synaq hattamasyna sáıkes, alynǵan sý úlgilerinen munaı ónimderi mólsheriniń belgilengen normatıvterden asyp ketkeni anyqtalmady. Aqbulaq ózenindegi jaǵdaı baqylaýda, — delingen mınıstrlik jaýabynda.
Eske salaıyq, buǵan deıin áleýmettik jelide Ertis ózeninen bólinip aǵatyn jyly aǵys saǵasynyń munaı ónimderimen lastanyp, sý betinde maı qabaty túzilgeni týraly vıdeo taraǵan edi.
