Ekologııa mınıstrligi Іle-Balqashtaǵy jolbarysqa qatysty aqparatty joqqa shyǵardy
ASTANA. KAZINFORM – Ekologııa jáne tabıǵı resýrstar mınıstrligi jelide taraǵan «jolbarys» fotosy shyndyqqa sáıkes kelmeıtinin eskertti.
— Áleýmettik jelilerde «Іle-Balqash» memlekettik tabıǵı rezervatynyń aýmaǵynda tabıǵatqa jiberilgen jolbarys túsirildi degen aqparatpen fotosýret tarap jatyr. Bul aqparat shyndyqqa sáıkes kelmeıdi, — delingen mınıstrlik habarlamasynda.
Jarııalanǵan sýrette jasandy ıntellekt (AI) arqyly jasalǵan bolýy múmkin belgiler baıqalady.
— Tabıǵatqa jiberilgen jolbarys analyǵy spýtnıktik GPS-oshaqpen jabdyqtalǵan. «Іle-Balqash» memlekettik tabıǵı rezervatynyń mamandary onyń ornalasqan jeri men jaǵdaıyn táýlik boıy úzdiksiz baqylaýda ustaıdy. Sondyqtan janýardyń «kezdeısoq túsirilgeni» týraly aqparat shyndyqqa janaspaıdy, — delingen habarlamada.
Mınıstrlik azamattar men BAQ ókilderin tekserilmegen aqparatty taratpaýǵa jáne tek resmı aqparat kózderine ǵana senýge shaqyrdy.
Aıta ketelik elimizde 70 jyldan keıin alǵash ret jolbarys tarıhı mekendeý arealyna jiberilgen edi.
