Ekologııa mınıstrligi qoqys polıgondaryn ýtıl alym esebinen salmaq

ASTANA. KAZINFORM — Qazir keıbir óńir ákimdikteri 52 qoqys polıgon salý jumysyn júrgizbeı otyr. Bul týraly Ekologııa jáne tabıǵı resýrstar mınıstri Erlan Nysanbaev málim etti.

— Josparǵa saı 100 jańa qoqys polıgonyn salý kózdelse, qazir 52 polıgon boıynsha ákimdikter jumys júrgizbeı otyr. Onyń ishinde Abaı oblysynda 22 polıgon boıynsha, Aqmola oblysynda 4 polıgon jáne Soltústik Qazaqstan oblysynda 8 polıgonnyń qujattama merzimi ótken, al túzetý múldem josparda joq, — dedi Erlan Nysanbaev Úkimet otyrysynda.

Sondaı-aq mınıstr jańa qoqys polıgondary qurylysyn qarjylandyrý qarajat tapshylyǵyna baılanysty júrgizilmeıtinin málim etti. 

— Osyǵan baılanysty bizdiń mınıstrlik ýtıltólem esebinen qatty turmystyq qaldyqtar polıgondarynyń qurylysyn qarjylandyrý máselesin pysyqtady. Bul 11 óńirde quny 53 mıllıard teńgeni quraıtyn 43 polıgon salýǵa múmkindik beredi, — dep túsindirdi Ekologııa mınıstri.

Eske salaıyq, byltyr belgili bolǵandaı Qazaqstanda ýtıl alymy joıylmaıtyn boldy. 

Buǵan deıin habarlaǵanymyzdaı, elimizdegi qoqys polıgondarynyń 20,6 paıyzynyń ǵana ruqsat qujaty bar.