Ekologııa mınıstrligi kıik atýdan bas tartpaqshy

ASTANA. KAZINFORM — Ekologııa jáne tabıǵı resýrstar mınıstrligi Kazinform saýalyna joldaǵan jaýapta kıik sanyn retteýdiń negizgi qaǵıdattary aıqyndalǵanyn málim etti. 

— Ekologııa jáne tabıǵı resýrstar mınıstrligi Memleket basshysynyń tapsyrmasyna sáıkes kıik popýlıatsııasyn basqarý máselesin keshendi túrde qaıta qarastyryp jatyr. Mınıstrlik úshin basty qaǵıdat — bıoalýantúrlilikti saqtaý men aýyl sharýashylyǵy salasynyń múddelerin teń úılestirý. Qazirgi tańda kıik sanyn retteý maqsatynda tikeleı izgilikke qaıshy ádisterden bas tartylyp otyr, — dep jazylǵan jaýapta.

Vedomstvo mamandarynyń málimetine súıensek izgilikke qaıshy ádister úsh baǵytqa qurylǵan. Olar:

— Spýtnık arqyly baqylaý jolymen kıik mıgratsııasy men shoǵyrlanýyn monıtorıngileý jáne boljaý;

— Kıik sanyn bıologııalyq shekterde (arnaıy qaýmaldarda) ustaý úshin uzaq merzimdi ǵylymı negizdelgen jospar ázirleý;

— Fermerlerge qoldaý tetikteri — qorshaý quraldaryna sýbsıdııalar, zalaldy óteý ádistemesin ázirleý;

— Tıisti zańnamalyq ózgerister — kıik qozǵalys dálizderimen úılestirip, jaıylymdardy basqarý.

— Mınıstrlik «tabıǵatty qorǵaý — adamdy qorǵaý» qaǵıdatyna súıene otyryp, halyqaralyq tájirıbe men ǵylymı usynystar negizinde ekojúıelik tepe-teńdikti saqtaıtyn utymdy sheshimderdi qarastyrýda, — delingen resmı jaýapta.

Al buǵan deıin Ekologııa jáne tabıǵı resýrstar mınıstri Erlan Nysanbaev BAQ ókilderiniń suraǵyna bergen jaýabynda kıik sanyn retteý arnaıy qaýmalda ustaý nemese atý arqyly uıymdastyrylýy múmkin ekenin aıtqan edi.