Ekologııa mınıstrligi búrkit sany men qusbegilik normalaryn qalaı rettemekshi – mınıstr jaýaby
ASTANA. KAZINFORM – Úkimet otyrysynan keıin ótken baspasóz máslıhatynda Ekologııa jáne tabıǵı resýrstar mınıstri Erlan Nysanbaev Qazaqstan aýmaǵyn tirshilik mekenine aınaldyrǵan búrkit sanyn bilmeıtinin aıtty.
— Ornıtologtar elektr jelisiniń kóp tartylýy men qusbegiliktiń qaıta jandanýyna baılanysty jabaıy tabıǵatta búrkit sany azaıyp ketkenin aıtyp júr? Qusbegilerdiń búrkitti jabaıy tabıǵatqa qaıta bosatýyn retteıtin normalar engizesizder me? Eldegi búrkitterdiń neshe paıyzy jabaıy tabıǵatta, neshe paıyzy qusbegilerdiń qolynda, — dep surady jýrnalıst.
Mınıstr vedomstvo mamandarynyń qolynda bul týraly naqty statıstıka joq ekenin aıtty. Sebebi, búrkit qyzyl kitapqa enbegen.
— Búrkitti jabaıy tabıǵattan alý, ony qaıta bosatý máseleleri jabaıy ańǵa tıesili zańda belgilengen normatıvtik-quqyqtyq aktileri bar. Ol jaǵynan eshqandaı másele joq. Búrkit sanyn naqty bilmeımin. Resmı sandar bizde joq. Ony esepteýge qarajat qaıda? Búkil ańdy esepteý úshin qarajat kerek. Sondyqtan Qyzyl kitaptaǵy, joıylyp ketý qaýpi bar qustardy ǵana nazarda ustaımyz. Qalǵandary nazardan tys qalyp tur. Sol sebepten búrkit, suńqar sııaqty jyrtqysh qustardy baqylaýǵa alatyn ýaqyt keldi. Sol úshin bolashaqta bul máseleni ǵylymı-zertteý jumystary arqyly bilip, sonyń anyq-qanyǵy boıynsha is-sharalardy qarastyramyz, — dedi Erlan Nysanbaev.
Mınıstrdiń aıtýyna qaraǵanda, búrkitten góri suńqarlardyń máselesi ótkir bolyp tur.
— Ózderińiz sııaqty osyndaı problema bar ekenin estip júrmiz. Tek búrkit qana emes, suńqarlardyń azaıyp ketkeni týraly málimetter bar. Shamamen bir aı buryn ǵalymdarmen osy máseleni talqylaǵanbyz. Oǵan ázir qarajat qarastyrý kerek, muny zertteý kerek. Árıne, tok júretin symdar tek búrkitke ǵana emes, qaı-qaı qustyń popýlıatsııasyna áser etip jatyr. Sol sebepten eń aldymen ǵylymı-zertteý jumystaryn uıymdastyrý kerek bolyp tur. Mysaly, eki jyldaı buryn Reseı ǵalamy suńqar máselesin kóterdi. Degenmen naqty derekter joq. Sondyqtan jaı aıtylǵan boljamdar negizinde qandaı da bir is-shara qabyldaýǵa bolmaıdy. Ǵalymdar suńqarlar máselesin zertteý kerek dep otyr. Búrkitke siz aıtqan faktorlardyń áseri tıip jatsa, suńqarlarǵa keıbir memleketterdiń azamattary qyzyǵýshylyq tanytqan jaǵdaılar boldy. Biraq qazir ondaı qyzyǵýshylyqtarǵa qatań tyıym salynǵan, zań bar, — dedi vedomstvo basshysy.
Aıta ketsek, búgingi Úkimet otyrysynda Premer-mınıstr Oljas Bektenov Ekologııa jáne tabıǵı resýrstar mınıstrliginiń qoqys polıgondaryn salý baǵdarlamasyn baıaý iske asyryp jatqanyn aıtyp, synady.