Ekologııa mınıstrligi «Bókeıorda» basshysynyń ustalýyna baılanysty túsinikteme berdi
ASTANA. KAZINFORM – Ekologııa jáne tabıǵı resýrstar mınıstrligi Kazinform saýalyna joldaǵan jaýapta jýyqta ǵana basshysy sybaılas jemqorlyq kúdigine ilingen «Bókeıorda» rezervatynyń jumysyna qaı vıtse-mınıstr jaýapty ekenin aıtty.
Máseleniń mán-jaıy
Sybaılas jemqorlyqqa qarsy is-qımyl agenttigi Ekologııa jáne tabıǵı resýrstar mınıstrligine qarasty «Bókeıorda» memlekettik tabıǵı rezervaty» RMM bas dırektorynyń jemqorlyq kúdigine ilingenin habarlaǵan bolatyn.
- Ol rezervatta shyn máninde eńbek qyzmetin atqarmaǵan tulǵaǵa jalaqyny zańsyz esepteý arqyly iri mólsherde bıýdjet qarajatyn jymqyrdy degen kúdikke ilindi. Kúdikti sottyń sanktsııasymen qamaýǵa alyndy. Qazirgi ýaqytta onyń basqa qylmystarǵa qatysy tekserilip jatyr, — delingen habarlamada.
«Memlekettik qyzmeti týraly» Zańnyń 60-babynyń 3-1-tarmaǵy boıynsha, eger basshy taǵaıyndalǵannan keıin úsh aı ótken soń onyń tikeleı baǵynysty qyzmetkeri sybaılas jemqorlyq qylmys jasaǵany dáleldense, basshy otstavkaǵa ótinish berý kerek. Ol ótinishti qabyldaý-qabyldamaý týraly sheshimdi ýákiletti organ nemese sol organdy basqaratyn laýazymdy tulǵa qabyldaıdy.
Kazinform osy jaıttardy eskerip, mınıstrlikke resmı saýal joldady.
- Bul istiń búge-shigesi burmalanyp ketpeý úshin, salaǵa jaýapty vıtse-mınıstr tergeý sharalaryna syrttan yqpal etpeý úshin ony qyzmetten ýaqytsha shettetý týraly sheshim qabyldandy ma? Tergeý men sot úkimi agenttik taqqan aıypty rastasa, vıtse-mınıstr qol astyndaǵy qyzmetkerdiń sybaılas-jemqorlyq áreketine jol bergeni úshin laýazymynan bosatasyz ba, - delingen saýalda.
Mınıstrliktiń ustanymy
Mınıstrlik jaýabynda vıtse-mınıstrdiń keleshegine qatysty sheshim kúdiktiniń qylmysy dáldengen jaǵdaıda ǵana qabyldanatyny aıtylǵan.
- Erekshe qorǵalatyn tabıǵı aýmaqtar salasyndaǵy strategııalyq, retteýshi, atqarýshylyq, baqylaý-qadaǵalaý fýnktsııalaryn mınıstrlikke baǵynysty «Orman sharýashylyǵy jáne janýarlar dúnıesi komıteti» respýblıkalyq memlekettik mekemesi júzege asyrady.
Bul salada qalyptastyratyn saıasat pen strategııany iske asyrý Ekologııa jáne tabıǵı resýrstar vıtse-mınıstri – Nurken Shárbıevke júktelgen. Tıisti sharalar quqyq buzýshylyqtyń dáleldenýinen keıin qabyldanady. Tergeý men sot úkimi kúdiktige qatysty aıypty rastaǵan jaǵdaıda zań talaptaryna sáıkes sharalar qabyldanady, - dep jazylǵan mınıstrlik jaýabynda.